Farg‘ona viloyati sog‘liqni saqlash boshqarmasining 25-oktabr kuni bergan xabariga ko‘ra, Farg‘ona shahar 9-sonli maktabgacha ta’lim tashkilotida tarbiyalanayotgan 11 nafar tarbiyalanuvchi ovqatdan zaharlandi.
Bosh prokuratura matbuot kotibi Hayot Shamsutdinovning xabar berishicha, ular 23—24-oktabr kunlari “o‘tkir diareya” tashhisi bilan viloyat yuqumli kasalliklar shifoxonasiga murojaat qilgan. Shifoxonaga yotqizilgan tarbiyalanuvchilarda kuzatilayotgan xastalik aralash ovqatlanish natijasida kelib chiqadigan funksional buzilish tashxisi qo‘yilgan.
Qayd etilishicha, ushbu bog‘cha tarbiyalanuvchilariga 2019-yil yanvar oyidan buyon “Autsorsing” tizimi bo‘yicha “Far G.T.” xususiy korxonasi tomonidan mahsulotlar tayyorlanib kelingan.
Holat yuzasidan Farg‘ona shahar prokuraturasi tomonidan tergovga qadar tekshirish harakatlari olib borilmoqda. Tekshirishda ommaviy zaharlanish holati haqidagi xabar o‘z vaqtida berilmaganligi bo‘yicha mutasaddi idoralarga xizmat tekshiruvlari tayinlangan.
Eslatib o‘tamiz, bundan avval Bekobodda bog‘cha bolalari ovqatdan zaharlangandi. Bog‘cha mudirasi, oshpaz va hamshira lavozim majburiyatlarini bajarmaganligi va loqayd xatti-harakati natijasi oqibatida bolalar sog‘lig‘iga zarar yetkazilganligi sababli, ishdan olingan.
Mavzuga doir:
Izoh (0)