Qashqadaryoda 12-noyabr kuni er-xotin 4 nafar farzandi va bir nafar jiyani bilan pomidor-bodring konservasidan zaharlangani haqida xabar berilgan edi. O‘zbekiston Sog‘liqni saqlash vazirligi mazkur holat bo‘yicha ma’lumot berdi.
Qashqadaryo viloyati sog‘liqni saqlash boshqarmasi axborot xizmatining xabar berishicha, joriy yilning 14-noyabr kuni soat 09:00 da Chiroqchi tumani Langar MFY Tutli qishlog‘ida yashovchi 7 nafar fuqaro tuman yuqumli kasalliklar shifoxonasiga olib kelingan. Bemorlarga ovqatdan zaharlanish — “Botulizm”ga gumon tashxisi qo‘yilgan. Ularga birinchi tibbiy yordam ko‘rsatilib, uch nafari Respublika shoshilinch tibbiy yordam ilmiy markazi viloyat filiali reanimatsiya bo‘limiga, to‘rt nafari esa viloyat yuqumli kasalliklar shifoxonasi reanimatsiya bo‘limiga yotqizilgan.
Mavzuga doir: Qashqadaryoda bir oilada 7 kishi pomidor-bodring konservasidan zaharlandi. Ularning 5 nafari bolalar
Epidemologik surishtiruv davomida va bemorlarning bir haftalik taomnomasi o‘rganilganida, bemorlar 2019-yil 13-noyabr kuni kechki payt soat 17:00 da N.H.ning xonadonida osh bilan uch litrli shisha bankada uy sharoitida tayyorlangan pomidor konserva mahsulotini iste’mol qilgani ma’lum bo‘lgan. Ertasi kuni ertalab soat 08:30 da ularning barchasida ko‘ngil aynishi, holsizlanish, qayt qilish kabi kasallik alomatlari paydo bo‘lgan. So‘ng bemorlar shu kuni tuman yuqumli kasalliklar shifoxonasiga murojaat qilgan.
Respublika shoshilinch tibbiy yordam ilmiy markazi viloyat filialida davolanayotgan oila boshlig‘i, uning turmush o‘rtog‘i va katta o‘g‘liga “Botulizm” kasalligining og‘ir darajasi, o‘tkir toksemiya davri, toksik neyropatiya, o‘tkir nafas yetishmovchiligi I darajasi tashxisi qo‘yilgan. Ularning ahvoli jiddiy.
Viloyat yuqumli kasalliklar shifoxonasida davolanayotgan qolgan bemorlarning ahvoli esa qoniqarli. Ayni paytda tajribali shifokorlar tomonidan bemorlarga malakali tibbiy xizmat ko‘rsatilmoqda.
Bemorning xonadoni o‘rganilganda uy sharoitida tayyorlangan turli hajmdagi 13 dona konserva mahsuloti tegishli tartibda iste’moldan olinib, yo‘q qilingan.
Hozirda tuman sanitariya-epidemiologiya osoyishtalik markazi tomonidan hudud aholisi o‘rtasida “Botulizm” kasalligining oldini olish bo‘yicha targ‘ibot ishlari kuchaytirilib, aholi o‘rtasida tushuntirish ishlari olib borilayapti. Xonadonlarda uy sharoitida tayyorlangan, iste’molga yaroqsizligi aniqlangan konserva mahsulotlarini yo‘q qilish choralari ko‘rilayapti.
Sog‘liqni saqlash vazirligi fuqarolardan uy sharoitida tayyorlangan konserva mahsulotlarini iste’mol qilishdan saqlanishni so‘raydi.
Izoh (0)