Ovqatdan zaharlanish belgilari va bunday holatda uy sharoitida birinchi yordamni qanday ko‘rsatish haqida gastroenterolog Xolida Xalimova “Daryo”ga o‘z tavsiyalarini berdi.
Shifokorning aytishicha, yoz faslida asosan tarvuz-qovun mahsulotlaridan zaharlanish ko‘proq kuzatiladi.
“Odam biror narsa iste’mol qilib zaharlanganda ovqatlanishdan so‘ng 3-4 soat o‘tib tanada holsizlanish ro‘y beradi. Harorat biroz ko‘tarilishi, ko‘ngil aynishi va qayt qilishi mumkin, 5-6 soatdan keyin ich ketishi boshlanadi.
Ko‘ngil aynishi natijasida qayt qilish kuzatilganda, ovqat yeyishni to‘xtatish lozim. Iloji boricha hech narsa yemaslik kerak. Harorat ko‘tarilganda esa ko‘proq suv ichish tavsiya etiladi. Suv ichgandan keyin ham qayt qilish to‘xtamasa, shifokorga murojaat qilinadi.
Kuniga 4-5 marta ich ketib, qorinda kuchli og‘riq paydo bo‘ladi. Yosh bolalarda ayniqsa, boshini yostiqdan ko‘tara olmay uxlash kuzatiladi. O‘zboshimchalik bilan davolashga harakat qilmaslik lozim”, — dedi Xolida Halimova.
Gastroenteologning tavsiya qilishicha, ovqatdan zaharlanganda uy sharoitida bemorning tana harortai 37-38 gradusgacha, shifokor ko‘rigiga qadar birinchi yordamni ko‘rsatib turish tavsiya etiladi.
“Bunda anor po‘stlog‘idan tayyorlangan damlamani ichish yordam beradi. Damlamani to‘g‘ri tayyorlashga ham ahamiyat qaratish kerak. Po‘stloqlarni qaynatib emas, balki oddiy choy kabi damlab iste’mol qilish lozim. Bu ich ketishni va ko‘ngil aynishini to‘xtatishga yorda beradi. Qayt qilish to‘xtamay, ko‘p takrorlanaversa shifokor kelgunga qadar bemorga bir ampula “Novokain”ga bir qoshiq suv solib ichirilsa, qayt qilish birozga to‘xtab turadi”, — dedi shifokor.
Avvalroq gastroenterolog Xolida Xalimova poliz yekinlaridan zaharlanmaslik uchun ularni iste’mol qilganda nimalarga ahamiyat berish kerakligi haqida tushuntirish bergandi.
Eslatib o‘tamiz, Namangan viloyati Norin tumanida bir oila tarvuzdan zaharlandi, ularning ikki nafari vafot etgani haqida xabar berilgandi. Oila dehqon bozoridan tarvuz sotib olgan hamda ikki kun muzlatkichda saqlab, iste’mol qilgan tarvuz mahsulotidan zaharlangan.