Ijtimoiy tarmoqlarda Toshkent viloyati Quyi Chirchiq tumanidagi 8-sonli maktabgacha ta’lim tashkiloti tarbiyalanuvchilari orasida o‘tkir diareya holati qayd etilgani to‘g‘risida xabarlar tarqaldi. Holat yuzasidan Sanitariya-epidemiologik osoyishtalik va jamoat salomatligi xizmati ma’lumot berdi.
Ta’kidlanishicha, 28-sentabr kuni Quyi Chirchiq tumani tibbiyot birlashmasi yuqumli kasalliklar bo‘limiga ta’lim tashkilotining 23 nafar tarbiyalanuvchisi ko‘ngil aynishi, qayt qilish, ich ketishi, tana haroratining (37—39 daraja) ko‘tarilishi va tomog‘ida og‘riq shikoyatlari bilan murojaat qilgan. Shifokorlar ko‘rigidan so‘ng ulardan 15 nafariga o‘tkir respirator infeksiya, O‘RI, funksional diareya birlamchi tashxisi qo‘yilib, shifoxonaga yotqizilgan. 8 nafariga esa ko‘rsatilgan birinchi tibbiy yordamdan keyin qoniqarli ahvolda (ota-onalari shifoxonaga yotqizishdan bosh tortgan) uylariga ruxsat berilgan.
Yuzaga kelgan vaziyatni joyiga chiqib o‘rganish va bemorlarni davolash hamda epidemiyaga qarshi tadbirlarni o‘tkazishda mahalliy mutaxassislarga amaliy yordam ko‘rsatish uchun Sanitariya-epidemiologik osoyishtalik va jamoat salomatligi xizmati, Respublika ixtisoslashtirilgan epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazi mutaxassislari Toshkent viloyati Quyi Chirchiq tumaniga yuborildi.
Shifoxonada bemor bolalarga malakali tibbiy xizmat ko‘rsatilgan, tegishli laboratoriya tahlillari uchun namunalar olingan. O‘tkazilgan muolajalardan keyin ahvoli yaxshilangan barcha bemorlarga 2-oktabrga qadar uylariga ruxsat berilgan. Bemorlardan olingan namunalarning tahlillari natijalariga ko‘ra, ulardan 3 nafarida Shigella dysenteriae sonnei bakteriyalari aniqlandi.
MTT ichimlik va oqova suv tizimlari, oshxona anjomlari, havo so‘ruvchi ventilyatsiya tizimi, hojatxonalar sanitariya-gigiyena talablariga to‘liq amal qilinmayotgani aniqlandi. Bundan tashqari, MTTda faoliyat yuritayotgan xodimlardan 4 nafari tibbiy ko‘rikdan o‘tmagan.
MTTda taomlari (sutkalik namunalar) va oziq-ovqat mahsulotlari, oshxona anjomlari va yuzalaridan olingan namunalarda ichak tayoqchalari guruhiga mansub bakteriyalar (ITBG) aniqlandi. Aniqlangan kamchiliklarni bartaraf qilish hamda kelgusida maktabgacha ta’lim tashkilotlari tarbiyalanuvchilari orasida ovqatdan zaharlanish holatlariga yo‘l qo‘ymaslik yuzasidan Maktabgacha ta’lim vazirligiga xat kiritildi.
30-sentabrdan 8-MTTning ish faoliyati yo‘l qo‘yilgan kamchiliklar bartaraf etilgunga qadar vaqtincha to‘xtatilgan hamda MTT direktoriga nisbatan ma’muriy bayonnoma rasmiylashtirilgan.
Ma’lumot o‘rnida, respublikadagi barcha ta’lim muassasalari va maktabgacha ta’lim tashkilotlaridagi sanitar-gigiyenik holatlar tizimli ravishda Sanepidxizmat mutaxassislari tomonidan o‘rganib borilmoqda.
Mavzuga doir:
Izoh (0)