Ma’lum bo‘lishicha, 2-avgustdan 11-avgustgacha intoksikatsiya sindromining klinik ko‘rinishlari bo‘lgan tarbiyalanuvchilar Toshkent pediatriya instituti klinikasi, Respublika shoshilinch tibbiy yordam ilmiy markazi, Toshkent 1-shahar yuqumli kasalliklar klinik shifoxonasi, Toshkent viloyati bolalar ko‘p tarmoqli tibbiyot markazi va Oqqo‘rg‘on tumani yuqumli kasalliklar shifoxonasiga joylashtirilgan.
12-avgust holatiga ko‘ra, 6 nafar tarbiyalanuvchi og‘ir holatda jonlantirish bo‘limida davolanmoqda, shundan bir nafar tarbiyalanuvchi o‘pkaning sun’iy nafas berish moslamasiga (IVL) ulangan bo‘lib, o‘ta og‘ir holatda qolmoqda. Qolgan 19 nafar tarbiyalanuvchining holati o‘rtacha og‘ir deb baholangan. Kasalxonaga yotqizilgan tarbiyalanuvchilardan bakteriologik tekshiruv o‘tkazish uchun tahlillar olingan va laboratoriyaga yuborilgan.
Epidemiologiya, mikrobiologiya va yuqumli kasalliklar ilmiy-tadqiqot instituti mutaxassislari tomonidan konsilium o‘tkazilib, kasalxonaga yotqizilgan tarbiyalanuvchilarga klinik ko‘rinishlariga ko‘ra “botulizm” tashxisiga gumon qilingan. Yakuniy tashxis epidemiologik tekshiruv natijalari hamda bakteriologik tadqiqot ma’lumotlariga asoslanib qo‘yiladi. Davolanish davomida 21 nafar tarbiyalanuvchilarning salomatligi holatida ijobiy o‘zgarishlar kuzatilmoqda.
Kasallikka chalinmagan mazkur maktabgacha ta’lim tashkiloti tarbiyalanuvchilari har kuni tibbiyot xodimlari tomonidan tibbiy ko‘rikdan o‘tkazilib nazoratga olinmoqda.
Eslatib o‘tamiz, 2019-yili mamlakatda ovqatdan ommaviy zaharlanish bo‘yicha bir nechta holat qayd etilgandi. Xususan, 2019-yilning 20-sentabr kuni Namanganda o‘tkazilgan to‘y marosimida 18 kishi, 27-sentabr kuni Bekoboddagi 15-maktabgacha ta’lim tashkilotida 15 nafar bola, 30-sentabr kuni Andijondagi xususiy maktabda 82 nafar bola, 8-oktabr kuni Andijondagi 35-maktabda 27 kishi, xususan, 24 nafar bola ovqatdan zaharlanib, kasalxonaga yotqizilgandi.
Izoh (0)