Samarqand shahrida 10-oktabr kuni ikkita maktabgacha ta’lim tashkilotining bolalari ovqatdan zaharlanib, viloyat yuqumli kasalliklar shifoxonasiga yotqizilgan.
Bolalarning ovqatdan zaharlanishi holatlari 98- va 106-maktabgacha ta’lim tashkilotlarida yuz bergan. “Daryo” muxbiri Farhod Norbo‘tayevning xabar berishicha, har ikki tashkilot oziq-ovqat ta’minotida autsorsing xizmatidan foydalanib kelgan.
Samarqand viloyati maktabgacha ta’lim boshqarmasi boshlig‘i o‘rinbosari Dilfuza Azizova bolalar haqiqatan ham ovqatdan ommaviy zaharlanganini tasdiqladi.
“Jami 9 nafar bola shifoxonaga yotqizilgan. 98-bog‘chadan 4 nafar, 106-bog‘chadan esa 5 nafar bola ovqatdan zaharlangan. Hozirda Davlat sanitariya epidimologiya nazorati markazi zaharlanish sabablarini o‘rganmoqda”, — deya ma’lum qildi Dilfuza Azizova.Ma’lumot uchun, so‘nggi bir oy davomida O‘zbekistonda ovqatdan ommaviy zaharlanish holatlari bir necha bor yuz berdi. Xususan, 20-sentabr kuni Namanganda o‘tkazilgan to‘y marosimida 18 kishi, 27-sentabr kuni Bekoboddagi 15-maktabgacha ta’lim tashkilotida 15 nafar bola, 30-sentabr kuni Andijondagi xususiy maktabda 82 nafar bola, 8-oktabr kuni Andijondagi 35-maktabda 27 kishi, xususan, 24 nafar bola ovqatdan zaharlanganib, kasalxonaga yotqizilgan.
Samarqand viloyatining o‘zida esa oxirgi bir oy davomida kamida ikki marta shunday favqulodda vaziyat kuzatildi: 14-sentabr kuni bo‘lib o‘tgan to‘ydan so‘ng 10 dan ortiq odam shifoxonaga murojaat qilgan, 6-oktabr kuni esa Samarqand shahridagi xot-dog shoxobchalaridan birida ovqatlangan kamida 24 kishi ertasi kuni kasalxonaga yotqizilgan.
Izoh (0)