“Hududgazta’minot” Qibraydagi ommaviy zaharlanish holati yuzasidan rasmiy ma’lumot berdi

1-dekabr kuni Toshkent viloyati Qibray tumanida bir oilaning 16 nafar a’zosi is gazidan zaharlanib shifoxonaga yotqizilgani, jabrlanganlarning 11 nafari bolalar ekanligi haqida xabar berilgan edi. “Hududgazta’minot” AJ mazkur holat yuzasidan o‘rganish o‘tkazdi.

Qayd etilishicha, “Hududgazta’minot” AJ va “Hududgaz Toshkent” MChJning “Qibraytumangaz” filiali xodimlari Qibray tumani “Alisherobod” mahalla fuqarolar yig‘ini “Yangi tong” ko‘chasida joylashgan xonadonga vaziyatni o‘rganish uchun zudlik bilan yetib borgan.

Mutaxassislar tomonidan xonadondagi barcha gaz jihozlari va quvurlari qat’iy nazoratdan o‘tkazilganda, xonadonda gaz sizib chiqishi va is gazidan zaharlanish holatlariga olib keluvchi sabablar mavjud emasligi aniqlandi. Faqat, xonadonga o‘rnatilgan isitish moslamasining joylashuvi tasdiqlangan texnik rejaga zid ravishda, o‘zboshimchalik bilan o‘zgartirib olingani aniqlanib, darhol gaz ta’minotidan uzildi. Xonadon egasi o‘zi istiqomat qiluvchi hududda gaz ta’minotida uzilishlar bo‘lmaganligi va gaz ta’minoti korxonasiga hech qanday e’tirozi yo‘qligini ma’lum qildi, deyiladi xabarda.

Surishtiruvlar natijasida, voqea aslida bir kun avval mehmondorchilik uchun xonadonga kelgan qarindoshlarning qo‘lbola konserva mahsulotlarini iste’mol qilishi natijasida 7 fuqaro jumladan, ikki ayol va 5 nafar bola oziq-ovqatdan zaharlanib shifoxonaga yotqizilgani aniqlandi.

“ ‘Hududgazta’minot’ AJ ommaviy axborot vositalar va internet nashrlardan bunday baxtsiz holatlar, ayniqsa inson hayoti hamda salomatligi bilan bog‘liq ko‘ngilsiz xabarlarni tarqatishda holatni o‘rganib, rasmiy va aniq ma’lumotlar asosida e’lon qilishlarini, gaz iste’molchilaridan esa xonadon va boshqa binolardagi gaz anjomlarida gaz sizib chiqish holatlari bor yoki yo‘qligiga muntazam e’tiborli bo‘lishlarini hamda ulardan foydalanishda xavfsizlik texnikasi qoidalariga rioya qilishlarini so‘raymiz”, — deyiladi xabarda.

Ma’lumot uchun, 1-dekabr kuni Qibrayda bir oilaning 16 nafar a’zosi is gazidan zaharlangani haqidagi xabar O‘zbekiston Ichki ishlar vazirligi huzuridagi tergov departamenti saytida e’lon qilingan edi.