Amerikalik tadbirkor va AQSH Davlat boshqaruvi samaradorligi departamenti (DOGE)ning sobiq rahbari Ilon Mask xususiy kompaniyalarga oid maxfiy ma’lumotlarga ega bo‘lgan. Bu haqda The Washington Post (WP) gazetasi xabar bermoqda.
Ta’kidlanishicha, Mask bu ma’lumotlardan raqobatchilarga qarshi kurashda foydalanishi mumkin. Tekshiruv natijalariga ko‘ra, DOGE kamida yettita yirik departament yoki agentlikda raqobatchilarning tijorat sirlari, davlat shartnomalari to‘g‘risidagi oshkor etilmagan ma’lumotlar va maxfiy tartibga solish harakatlari yoki boshqa ma’lumotlarni o‘z ichiga olgan yozuvlarni ko‘rish huquqini qo‘lga kiritgan.
“Biz hukumatga taqdim etadigan ko‘plab ma’lumotlar raqobat nuqtai nazaridan maxfiy hisoblanadi. Buni amalga oshirganimizda ular himoyalangan deb o‘ylaymiz. Endi esa zaif ekanligimiz ma’lum bo‘lib qoldi”, dedi Maskning raqobatchilaridan biri.
Qayd etilishicha, ma’lumotlardan noqonuniy foydalanishning bevosita dalillari topilmagan, biroq DOGE kamida yettita federal agentlikning maxfiy ma’lumotlariga — NASA shartnomalaridan tortib amerikaliklarning moliyaviy ma’lumotlarigacha kirish imkoniyatiga ega bo‘lgan.
Bundan avval Ilon Mask agar AQSH prezidenti Donald Trampning soliq imtiyozlari to‘g‘risidagi qonun loyihasi qabul qilinsa, yangi partiya tuzish bilan tahdid qilgandi. Bunga javoban AQSH prezidenti Donald Tramp Ilon Mask boshqarayotgan Davlat samaradorligi departamentiga (DOGE) tadbirkorning o‘zini tekshirishni taklif etdi.
Fevral oyida Ilon Mask rahbarlik qiladigan AQSH Davlat boshqaruvi samaradorligi departamenti (DOGE) xodimlari millionlab davlat xizmatchilarining maxfiy ma’lumotlariga kirish huquqiga ega bo‘lgani aytilgandi.
Izoh (0)