Dubay valiahd shahzodasi Shayx Hamdon bin Muhammad Dubai Mall’dagi mashhur restoranlardan birida ovqatlanib, u yerda bo‘lgan barcha mehmonlarning chekini to‘lab berdi. Bu voqea internetda katta shov-shuvga sabab bo‘ldi. Internet foydalanuvchilari Birlashgan Arab Amirliklarining ikkinchi yirik amirligining bo‘lajak hukmdorini olqishlay boshladi.
42 yoshli Shayx Hamdon La Maison Ani restoraniga Abu Dabi valiahd shahzodasi va BAA bosh vaziri o‘rinbosari Shayx Xolid bilan birga tashrif buyurgan.
“Ular ochiqko‘ngillik bilan restorandagi barchaga salom berishdi, so‘ng hisobni so‘raganimda, Shayx Hamdon hamma uchun to‘lab ketganini aytishdi. Faqatgina BAAda shunday voqeaning guvohi bo‘lish mumkin”, deydi mehmonlardan biri Khaleej Times nashriga. Guvohlarning aytishicha, shahzoda taxminan 30 ming BAA dirhami (8 ming dollarga yaqin) to‘lagan.
Shayxning bunday saxiyligi ijtimoiy tarmoqlarda turli izohlarga sabab bo‘ldi. Kimdir uning saxovatini maqtadi, boshqalar esa Shayx Hamdonning boyligini hisobga olgan holda bu juda kichik xarajat ekanini aytdi.
Shayx Hamdon — Dubay hukmdori va BAA bosh vaziri Muhammad ibn Roshid Al Maktumning birinchi rafiqasidan tug‘ilgan o‘g‘li. U Buyuk Britaniyadagi Sandhyorst harbiy akademiyasida, so‘ng London iqtisodiyot maktabida tahsil olgan.
Ma’lumot uchun, Britaniya shahzodalari Garri va Uilyam ham aynan shu harbiy akademiyada o‘qigan. 2008-yilda 25 yoshida akasi Roshid taxtdan voz kechgach, u valiahd shahzoda sifatida tayinlangan. Forbes jurnali 2011-yilda uning boyligini 18 milliard dollarga baholagan. 2019-yilda esa amakivachchasi Shayxa bint Said bin Tani Al Maktumga uylangan. Hozirda u to‘rt farzandning otasi.
So‘nggi yillarda Dubay hukmdori oilasi ko‘p bora jamoatchilik e’tiborida bo‘ldi. Jumladan, Shayx Hamdonning o‘gay singlisi Shayxa Mahra turmush o‘rtog‘i bilan to‘ydan bir yil o‘tib ajrashganini Instagram sahifasida e’lon qilgandi. Oradan ko‘p o‘tmay u “Ajrim” nomli atir ishlab chiqarib, yana e’tibor markaziga tushdi.
Izoh (0)