AQSH prezidenti Donald Tramp Oq uyga keluvchilar oqimi tufayli uni “Markaziy vokzal” deb atamoqda. Bu haqda NBC telekanali xabar berdi.
Telekanal ma’lumotlariga ko‘ra, ba’zi amaldorlar bu vaziyat tufayli yuzaga kelishi mumkin bo‘lgan axborot sizishlaridan xavotirlanib, asabiylashmoqda.
Ma’lum qilinishicha, xavotirlar Oq uy rahbari va harbiy qo‘mondonlik yangi F-47 ko‘rinmas qiruvchi samolyotini muhokama qilayotgan paytda yuzaga kelgan. To‘satdan yig‘ilish o‘rtasida Amerika rahbari huzuriga Meta kompaniyasi raisi Mark Sukerberg kirib kelgan. Amaldorlar Sukerbergdan uning maxfiy ma’lumotlarga ruxsati yo‘qligi sababli tashqarida kutib turishni so‘rashgani. Uchrashuv davomida yosh yordamchi ham xonaga kirib, Trampga noutbukida nimanidir ko‘rsatgan va chiqib ketgan. Shu orada Amerika prezidentining telefoni bir-ikki marta jiringlagan.
Telekanal ta’kidlashicha, yordamchilar Trampni yillar davomida intizomga o‘rgatishga urinishgan, biroq to‘liq muvaffaqiyatga erisha olishmagan. NBC ma’lumotlariga ko‘ra, vazirlar ko‘pincha Oq uyda bekorga aylanib yurishadi, idora rahbarlari esa 30 daqiqalik tashrif o‘rniga bir necha soatlab qolib ketishadi.
Oq uyning yuqori martabali amaldorining aytishicha, Tramp Oval xonani mehribonlik bilan “Grand Central Terminal” deb ataydi. Chunki u yerga ko‘plab odamlar kelib-ketib turadi. Samolyot bilan bog‘liq qishki uchrashuvdan xabardor bo‘lgan shaxslardan biri esa bu vaziyatni “g‘alati dunyo” degan boshqacha ibora bilan ta’riflagan.
Agar siz tabiiy ofatlarga tayyorgarlik bo‘yicha yig‘ilishda bo‘lsangiz va keyingi yig‘ilish boshqa mavzuga bag‘ishlangan bo‘lsa ham Tramp “Qolavering”, deydi, deya ta’kidladi prezident ma’muriyatining yuqori lavozimli xodimi.
Izoh (0)