Toshkent viloyatida 3 million dollar kredit olib berishni aytib firibgarlik qilgan ikki kishi ushlandi. Bu haqda DXX matbuot xizmati xabar berdi.
Ma’lum qilinishicha, Toshkent shahrida savdo faoliyati bilan shug‘ullanuvchi MCHJ rahbari, 1979-yilda tug‘ilgan, muqaddam sudlangan ayol Toshkent viloyati Qibray tumanida yashovchi fuqaroning ishonchiga kirib, mansabdor tanishlari orqali aksiyadorlik tijorat banklardan biridan 3 million AQSH dollari miqdorida maqsadsiz kredit olib berishni va’da qilgan va evaziga kreditning 33 foizini, ya’ni 990 ming AQSH dollarini talab qilgan.
DXXning Toshkent viloyati bo‘yicha boshqarmasi hamda Iqtisodiy jinoyatlarga qarshi kurashish departamenti hamkorligida o‘tkazilgan tezkor tadbirda mazkur shaxs oldindan 150 ming dollarni olgan vaqtida ashyoviy dalillar bilan ushlangan.
Tezkor tadbir davomida, fuqaroga go‘yoki o‘zini bank xodimi sifatida tanishtirib, unga kredit mablag‘ini ajratib berishni va’da qilgan mazkur noqonuniy kelishuvning bosh tashkilotchisi — Urganch shahrida yashovchi, 1983-yilda tug‘ilgan shaxs ham protsessual tartibda ushlangan.
Mazkur shaxslarga nisbatan Jinoyat kodeksining 168-moddasi 4-qismi “a” bandi (juda ko‘p miqdorda firibgarlik) va 28,211-moddasi 3-qismi “a” bandi (juda ko‘p miqdorda pora berish) bilan jinoyat ishi qo‘zg‘atilib, qamoq ehtiyot chorasi qo‘llangan.
Hozirda tergov harakatlari olib borilmoqda.
Jinoyat kodeksiga ko‘ra, juda ko‘p miqdorda firibgarlik BHMning 400 baravaridan 600 baravarigacha miqdorda jarima yoki 8 yildan 10 yilgacha ozodlikdan mahrum qilish bilan jazolanadi. Juda ko‘p miqdorda pora berish esa 10 yildan 15 yilgacha ozodlikdan mahrum qilish bilan jazolanadi.
Izoh (0)