Kaliforniya aholisining 44 foizi shtatning AQSHdan ajralishini istaydi. Bu haqda Newsweek jurnali Kaliforniya Mustaqillik instituti (ICI) direktori Koyot Maringa asoslanib ma’lum qilgan.
ICI ma’lumotlariga ko‘ra, YouGov kompaniyasi 11-23 iyun kunlari 500 nafar kaliforniyalik o‘rtasida 5,7 foizlik xatolik chegarasi bilan so‘rovnoma o‘tkazgan.
“So‘ralganlarning deyarli yarmi — 44 foizi Kaliforniyaning AQSHdan tinch va qonuniy yo‘l bilan ajralish niyatini bildirish uchun ovoz berishga rozi bo‘lgan”, deyiladi xabarda.
Institut vitse-raisi Timoti Vollmer “kaliforniyaliklar o‘zini o‘zi boshqarishga tayyor” ekanligini qo‘shimcha qilgan.
Ta’kidlanishicha, AQSHdan ajralishni xohlovchi kaliforniyaliklar soni bo‘yicha avvalgi rekord natija 2021-yilning iyun oyida qayd etilgan bo‘lib, o‘shanda bu ko‘rsatkich 42 foizni tashkil etgan.
Bundan tashqari, YouGov so‘rovi natijalari shuni ko‘rsatdiki, respondentlarning 50 foizi federal hukumatga qaraganda Kaliforniya hukumatiga ko‘proq ishonch bildirmoqda. So‘ralganlarning 28 foizi ikkala hukumatga ham bir xil darajada ishonadi. Shu bilan birga, ICI ma’lumotlariga ko‘ra, 2025-yilning yanvar oyida kaliforniyaliklarning 47 foizi ikkala hukumatga bir xil darajada ishongan, faqat 34 foizi shtat hukumatiga ko‘proq ishonch bildirgan.
6-iyun kuni Los Anjelesda noqonuniy muhojirlarni ommaviy hibsga olish boshlandi, 7-iyun kuni kechqurunga kelib migratsiya qonunchiligini buzganlikda ayblanib, kamida 44 kishi qamoqqa olindi. Huquqni muhofaza qilish organlarining bu harakatlariga javoban shaharda tartibsizliklarga aylanib ketgan namoyishlar boshlandi. AQSH prezidenti Donald Tramp Kaliforniya gubernatori Gevin Nyusomni chetlab o‘tib, tartibsizliklarni bostirish uchun Los Anjelesga Milliy gvardiya askarlarini yuborishni buyurdi. Shundan so‘ng Nyusom Tramp va Pentagon rahbari Pit Xegsetga qarshi sudga murojaat qildi. Gubernator Milliy gvardiya askarlarini Los Anjelesga yuborish to‘g‘risidagi qarorni g‘ayriqonuniy deb topishni so‘radi.
Izoh (0)