Ozarbayjon Rossiya huquqni muhofaza qilish organlari xodimlari tomonidan uning fuqarolarini qiynoqqa solinib, o‘ta shafqatsizlik bilan o‘ldirilishi yuzasidan jinoyat ishi qo‘zg‘atdi. Bu haqda mamlakat Bosh prokuraturasi xabar berdi.
Dastlabki tergovga ko‘ra, 27-iyun kuni ertalab Rossiyaning Yekaterinburg shahrida huquq-tartibot xodimlari reyd o‘tkazib, Ozarbayjon fuqarolarini jinoyatga aloqadorlikda gumonlab, hibsga olgan. Hibsga olinganlar — deyarli himoyasiz bo‘lgan holatda — qo‘lga olish jarayonida, yo‘lda va ma’muriy binolarda qattiq qiynoqlarga, ko‘p marotaba og‘ir jarohatlarga duchor bo‘lgan. Ularning turli tana qismlariga qattiq va o‘tkir buyumlar bilan urilgan.
Oqibatda o‘sha kuni soat 15:00 atrofida Yekaterinburg shahar ichki ishlar bo‘limi binosida 1966-yilda tug‘ilgan ozarbayjonlik Guseyn Safarov, kichik biznes egasi, vafot etgan. Uning ukasi, 1970-yilda tug‘ilgan Ziyaddin Safarov esa ertalab maxsus bo‘linmaning xizmat mashinasida kaltaklanishdan vafot etgan. U ikki farzandning otasi bo‘lib, taksichilik qilgan.
Sud-tibbiy ekspertizaga ko‘ra, Guseyn Safarov qovurg‘a sinishlari va boshqa og‘ir tan jarohatlari oqibatida travmatik va qon yo‘qotish shokidan vafot etgan. Ziyaddin Safarov esa ko‘p sonli tan jarohatlari sababli travmatik shokdan o‘lgan.
Shuningdek, boshqa Ozarbayjon fuqarolari ham shu tergov doirasida qiynoqqa solingan va og‘ir hamda o‘rta darajadagi tan jarohatlari olgan. Ayni paytda ular Rossiyada davolanmoqda. Ozarbayjon bosh prokurori to‘plangan dalillar asosida quyidagi moddalar bo‘yicha jinoyat ishi qo‘zg‘atgan:
- 12.2-modda — Ozarbayjon fuqarosiga nisbatan respublikadan tashqarida sodir etilgan jinoyat uchun Ozarbayjon qonunchiligi bilan javobgarlikni belgilash;
- 120.2.1 — guruh bo‘lib qasddan odam o‘ldirish;
- 120.2.4 — o‘ta shafqatsizlik bilan odam o‘ldirish;
- 120.2.7 — ikki yoki undan ortiq kishini o‘ldirish;
- 120.2.9 — oldindan til biriktirgan holda odam o‘ldirish;
- 309.2 — vakolatni suiiste’mol qilish natijasida og‘ir oqibatlarga sabab bo‘lish;
- 293.3 — qiynoqqa solish yoki boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash, agar bu harakatlar ehtiyotsizlik ortidan jabrlanuvchining o‘limiga sabab bo‘lsa.
Tergovni Ozarbayjon Bosh prokuraturasi huzuridagi maxsus tergov boshqarmasi olib bormoqda. Ish yuzasidan tergov guruhi tuzilgan va faol surishtiruv ishlari olib borilmoqda.
Izoh (0)