Ozarbayjon Rossiya bilan munosabatlarning keskinlashuvi fonida mamlakatdagi rus tilidagi maktablarni yopishni boshlaydi. Bu haqda Oxu.az portali xabar berdi. “RBK” nashri esa Bokudagi maktablardan biridagi suhbatdoshga tayanib, bu ma’lumotni tasdiqlagan.
Ota-onalarga ko‘ra, maktablarning WhatsApp guruhlarida rus tilida ta’lim beruvchi muassasalarni bosqichma-bosqich yopish bo‘yicha rasmiy bildirishnomalar yuborilgan.
Kelgusi uch yil ichida rus tilidagi maktablar Ozarbayjon tilida o‘qitishga o‘tadi, o‘qituvchilar uchun qayta tayyorlash kurslari tashkil etiladi, deya xabar bermoqda Oxu.az.
Mektebgushesi nashrining ta’kidlashicha, Ozarbayjonda 340 ta rus tilidagi maktab mavjud bo‘lib, ularning 16 tasida ta’lim faqat rus tilida, qolganlarida esa ikki tilda olib boriladi. Bu maktablarda 150-160 ming o‘quvchi tahsil olayotgani aytilmoqda. Maktablarning aksariyati Bokuda joylashgan, ayrim hududlarida bunday maktablar umuman mavjud emas.
“RBK” nashri ma’lumotni o‘rganish uchun “Rossotrudnichestvo,” Ozarbayjon Ta’lim vazirligi va hukumati, shuningdek, Boku ta’lim boshqarmasiga so‘rov yuborgan. Biroq bu borada hali ma’lumot olmagan.
Rossiya va Ozarbayjon o‘rtasidagi keskinlik iyun oyi oxirida Yekaterinburgda Ozarbayjon diasporasi vakillarining 2001, 2010 va 2011-yillardagi qotilliklar va suiqasdlarda ayblanib, hibsga olinganidan so‘ng yuzaga keldi. Olti nafar shaxs qamoqqa olingan.
Yana ikki nafar gumonlanuvchi tergov harakatlari davomida vafot etgan. Rossiya Tergov qo‘mitasi ulardan biri “yurak yetishmovchiligidan” vafot etganini, ikkinchisining o‘lim sababi aniqlanayotganini da’vo qildi. Biroq Ozarbayjon tomoni sud-tibbiy ekspertizadan so‘ng ularning tanasida jarohatlar borligini aniqladi. Ozarbayjon hukumati fuqarolari shafqatsizlarcha kaltaklangani, etnik asosda ularga zo‘ravonlik qilinganini ta’kidladi. Holaе yuzasidan Ozarbayjon qasddan odam o‘ldirish, qiynoqqa solish va mansab vakolatini suiiste’mol qilish moddalari bo‘yicha jinoiy ish qo‘zg‘atgan.
Izoh (0)