Xiva shahrida 1-iyul kuni birinchi O‘zbekiston—Ozarbayjon parlamentlararo forumi o‘z ishini boshladi.
“Yangi imkoniyatlar sari: muloqotdan hamkorlikdagi harakatlargacha” mavzusidagi anjuman ikki mamlakat o‘rtasidagi strategik hamkorlikni yanada chuqurlashtirish, parlamentlararo muloqotni sifat jihatdan yangi bosqichga ko‘tarish maqsadini ko‘zlaydi.
Unda O‘zbekiston Oliy Majlisi va Ozarbayjon Milliy Mejlisi aʼzolari hamda ikki mamlakatning yoshlar parlamentlari vakillari ishtirok etmoqda.
Anjumanni Senat raisi Tanzila Norboyeva ochib berdi va o‘z nutqida taʼkidlaganidek, “Birinchi O‘zbekiston—Ozarbayjon parlamentlararo forumi — bu nafaqat tarixiy voqelik, balki ikki davlat parlamentlararo hamkorligini yangi bosqichga olib chiquvchi muhim platforma hisoblanadi. Biz mavjud imkoniyatlardan to‘liq foydalanish va Parlamentlararo komissiya tashkil etish orqali ikki tomonlama aloqalarni yangi bosqichga olib chiqishimiz zarur. Ushbu forum O‘zbekiston tashqi siyosatining ochiqlik, do‘stlik va barqaror taraqqiyotga yo‘naltirilganining yana bir yorqin dalilidir”.
Ozarbayjon Milliy Mejlisi raisi Sahiba Gafarova o‘z nutqida “bugun davlatlarimiz rahbarlarining siyosiy irodasiga asoslangan, mamlakatlarimiz o‘rtasidagi do‘stlik va birodarlikka tayangan parlamentlararo formatda hamkorlikning yangi sahifasi ochilyapti, deb taʼkidladi.O‘ylaymanki, parlamentlarimiz yangi formatda davlatlararo munosabatlarni chuqurlashtirish va har tomonlama rivojlantirishga turtki beradi”, deya taʼkidladi.
Shu bilan birga, u o‘z nutqi qonunchilik, biznes va iqtisodiyot chorrahasida turgan mavzu – kichik va o‘rta biznesni qo‘llab-quvvatlash, shuningdek, mamlakatlardagi sarmoyaviy muhitni yaxshilashga bag‘ishlanganini taʼkidladi.
Forumda do‘stlik guruhlari faoliyatini kengaytirish, ularni parlamentlararo komissiyalar darajasiga olib chiqish, qo‘shma qonunchilik tashabbuslarini ishlab chiqish, yoshlar tashabbuslarini qo‘llab-quvvatlash, shuningdek, iqtisodiyot, taʼlim, sog‘liqni saqlash, raqamli transformatsiya va ekologiya kabi ustuvor yo‘nalishlarda hamkorlikni rivojlantirish kabi masalalar muhokama qilinadi.
Shuningdek, hududiy vakillik organlari (O‘zbekistonda mahalliy Kengash va Ozarbayjonda munitsipalitet, ozarbayjoncha “belediye”) o‘rtasida tajriba almashish mexanizmini joriy etish, parlamentlararo hamkorlikni mustahkamlash va ijtimoiy, iqtisodiy rivojlanishdagi turli yondashuvlarning samaradorligini oshirish uchun muhim qadam hisoblanadi. Bu tashabbus mahalliy darajadagi qonunchilik organlari orasida bilim va tajriba almashishga, muammolarni hal qilishda yangicha qarashlar va ishlash usullarini tatbiq etishga imkon beradi, natijada har bir hududda ijobiy o‘zgarishlar yaratish uchun qulay shart-sharoitlar yaratiladi.
Forum doirasida o‘tkaziladigan panel sessiyalar ham shunga qaratilgan. Ular orasida parlamentlar roli, qonun ijrosini nazorat qilish, biznes va investitsiya muhitini yaxshilash, raqamli islohotlar, madaniyat va turizm sohalaridagi aloqalar, atrof muhitni muhofaza qilish hamda ayollar va yoshlarning jamiyatdagi o‘rni kabi mavzular alohida ahamiyat kasb etadi.
Forum yakunlari bo‘yicha strategik sheriklikni yanada mustahkamlash, ustuvor sohalarda ikki tomonlama hamkorlikni kengaytirish, shuningdek, qo‘shma tashabbuslarni samarali amalga oshirish bo‘yicha huquqiy asoslarni takomillashtirishga qaratilgan Xiva deklaratsiyasini qabul qilish nazarda tutilmoqda.
Izoh (0)