Turkiya va Ozarbayjon prezidentlari Rajab Erdo‘g‘on va Ilhom Aliyev Tog‘li Qorabog‘ning Shusha shahrida o‘zaro ittifoqchilik munosabatlari to‘g‘risidagi deklaratsiyani imzoladi. Bu haqda “RBK” xabar berdi.
Hujjatda keltirilgan qoidalar qatorida Ozarbayjonning Naxichevan viloyatini mamlakatning qolgan qismi bilan (Armanistonning Syunik viloyati orqali) bog‘lashi kerak bo‘lgan Zangezur yo‘lagining ochilishi ham bor.
Bundan tashqari, Erdo‘g‘on Shushada Turkiyaning bosh konsulligini ochish niyati borligini ma’lum qildi.
Deklaratsiyani imzolagandan so‘ng, prezident Aliyev ittifoqchilik qoidalari Ozarbayjon va Turkiya o‘rtasidagi qo‘shma mudofaa va o‘zaro harbiy yordam masalalarini aks ettirishini aytdi. U hujjatning o‘zini “ittifoqchilikning dunyodagi noyob namunasi” deb ta’rifladi.
Shusha — Tog‘li Qorabog‘dagi eng yirik aholi punktlaridan biri. Uning Ozarbayjon armiyasi tomonidan qaytarib olinishi 2020-yil kuzidagi qurolli to‘qnashuvning muhim voqealardan biri bo‘ldi.
2021-yil may oyida Aliyev rasmiy ravishda Shushani mamlakatning madaniy poytaxti deb e’lon qilgandi. U imzolagan buyruqda “Shusha shahrining tarixiy ko‘rinishini tiklash, uni avvalgi shon-shuhratiga qaytarish va an’anaviy mazmunli madaniy hayotni yangilash to‘g‘risida” qaror qabul qilingani ta’kidlangan. Shaharni dunyo miqyosida “ko‘p asrlik boy Ozarbayjon madaniyatining yorqin marvaridi” sifatida tanitish rejalashtirilgan.
Izoh (0)