Qozog‘iston prezidenti Qosim-Jo‘mart To‘qayev MDHning til makonini mustahkamlashda rus tilining rolini shubha ostiga olish mumkin emasligini aytdi, deb yozadi “TASS”.
“Albatta, MDHda madaniy-gumanitar hamkorlik va, to‘ppa-to‘g‘ri qayd etilganidek, til makonini mustahkamlash o‘chmas ahamiyatga ega. Bu yerda rus tilining o‘rniga nisbatan, tabiiyki, hech qanday shubha bo‘lishi mumkin emas”, — dedi To‘qayev MDH norasmiy sammitida.
Qozog‘iston prezidenti ta’kidlashicha, “2023-yilda Sankt-Peterburgga Hamdo‘stlikning madaniy poytaxti degan rasmiy maqom berilishi MDH mamlakatlari o‘rtasidagi madaniy aloqalarni mustahkamlash yo‘lida xizmat qiladi”.
Shuningdek, To‘qayev eslatishicha, 2023-yilda Hamdo‘stlik Rus tili yilini nishonlaydi va Qozog‘istonning MDH rahbarligi ostida Rus tilini qo‘llab-quvvatlash bo‘yicha xalqaro tashkilot tuzish bo‘yicha tashabbusi amaliy jihatdan rivojlanadi.
Sankt-Peterburgda MDH davlatlarining norasmiy sammiti bo‘lib o‘tmoqda. Uchrashuvda Hamdo‘stlikning yettita mamlakati — Ozarbayjon, Belarus, Qozog‘iston, Qirg‘iziston, Tojikiston, Turkmaniston va O‘zbekiston prezidentlari Ilhom Aliyev, Aleksandr Lukashenko, Qosim-Jo‘mart To‘qayev, Sadir Japarov, Emomali Rahmon, Serdar Berdimuhamedov va Shavkat Mirziyoyev, shuningdek, Armaniston bosh vaziri Nikol Pashinyan ishtirok etmoqda.
Eslatib o‘tamiz, avgust oyida Qozog‘iston maktablarida 6–7 yil ichida rus tilidan voz kechilishi haqida xabarlar tarqalgan edi. Keyinroq bu ma’lumotni Qozog‘iston Ta’lim vazirligi rad etgan.
Shundan keyin ko‘p o‘tmay, Qozog‘iston maktablarida birinchi sinfdan boshlab rus tilini o‘rganish bekor qilindi. Hozirgacha Qozog‘iston maktablarida birinchi sinf o‘quvchilariga bir vaqtning o‘zida uchta til – qozoq, rus va ingliz tillari o‘rgatilayotgan edi. Endilikda birinchi sinfdan boshlab bolalar faqat qozoq tilini o‘rganadi, chunki rus va ingliz tillarini o‘rganish uchun ular avvalo o‘z ona tilida o‘qish va yozishni bilishi kerak.
Shu bilan birga, Xalq ta’limi vazirining birinchi o‘rinbosari Sholpan Karinovaning ta’kidlashicha, ta’lim turi qozoq tilida olib boriladigan sinflarda ham, rus tilida olib boriladigan sinflarda ham rus tili bir xil rejimda o‘qitilishda davom etmoqda.
Izoh (0)