Kremlda Rossiya prezidenti Vladimir Putin raisligida MDHga aʼzo davlatlar rahbarlari kengashining navbatdagi yig‘ilishi bo‘lib o‘tmoqda.
Davlat rahbarlari cheklangan tarkibda qator masalalarni muhokama qiladi, so‘ngra delegatsiyalar a’zolari yig‘ilishga qo‘shiladi.
Tashkilot ijroiya qo‘mitasida maʼlum qilinishicha, Hamdo‘stlik mamlakatlari yetakchilari dolzarb mintaqaviy va xalqaro muammolarni muhokama qiladi, mamlakatlar o‘rtasidagi 2025-yilga mo‘ljallangan o‘zaro hamkorlikning asosiy masalalari yuzasidan fikr almashadi. Kengash majlisi ishtirokchilari Rossiyaning MDHga raisligi yakunlarini sarhisob qiladi va estafetani Tojikistonga topshiradi.
Rossiya prezidentining yordamchisi Yuriy Ushakov muzokaralar erkin munozara rejimida o‘tishini ta’kidlagan: ishtirokchilar o‘zlarini qiziqtirgan masalalar yuzasidan o‘z fikrlarini bildirishlari mumkin bo‘ladi. Ijtimoiy-iqtisodiy, madaniy-gumanitar, huquq-tartibot va mudofaa sohalarida hamkorlikni kengaytirishga qaratilgan ko‘p tomonlama hujjatlar imzolanishi rejalashtirilgan.
Kengash yig‘ilishidan oldin Putin bir qator ikki tomonlama uchrashuvlar o‘tkazdi, jumladan, Ozarbayjon prezidenti Ilhom Aliyev va Armaniston bosh vaziri Nikol Pashinyan bilan. Muzokaralarning asosiy mavzusi Boku va Yerevan o‘rtasidagi munosabatlarni normallashtirish masalasi bo‘lgan.
MDHning 2023-yilgi sammiti ham oktyabr oyida bo‘lib o‘tgan edi. Hamdo‘stlik mamlakatlari rahbarlari o‘tgan yili uyushmaga raislik qilgan Qirg‘iziston poytaxti Bishkekda uchrashgan. Yig‘ilish yakunlari bo‘yicha 17 ta hujjat, jumladan, rus tili bo‘yicha xalqaro tashkilotni tashkil etish to‘g‘risida, ko‘p qutbli dunyoda xalqaro munosabatlarga oid, davlat boshqaruvida raqamlashtirish va qo‘llab-quvvatlash sohasida hamkorlik, rus tilini millatlararo muloqot tili sifatida targ‘ib qilish to‘g‘risida hujjatlar imzolangan edi.
Izoh (0)