Amerikalik aktyor, taniqli rejissyor Kventin Tarantino filmlaridagi rollari bilan mashhur bo‘lgan Maykl Medsen 67 yoshida vafot etdi. U 3-iyul kuni ertalab Malibudagi uyida hushsiz holda topilgan. Uning menejeri Ron Smitning so‘zlariga ko‘ra, aktyor o‘limiga yurak urishining to‘xtashi sabab bo‘lgan.
Medsen rejissyor Kventin Tarantino filmlaridagi jinoyatchi va xavfli shaxslar obrazi bilan mashhur bo‘lgan. U “Quturgan itlar” filmida Mister Blond obrazini gavdalantirgan, shuningdek, “Billning qotili”, “Mudhish sakkizlik” va “Bir kuni Gollivudda” kabi filmlarda ham rol o‘ynagan.
40 yildan ortiq davom etgan ijodiy faoliyati davomida u o‘nlab filmlarda suratga tushgan, jumladan, “Telma va Luiza”, “Donni Brasko” hamda “Gunohlar shahri” filmlarida ishtirok etgan. U nafaqat aktyor, balki yozuvchi ham edi. Medsen “Otam uchun to‘kilgan yoshlar” nomli she’riy to‘plamini nashrga tayyorlayotgan edi.
So‘nggi yillarda Maykl Medsen ko‘proq mustaqil kinolarda ishladi va yangi rollarni katta sabrsizlik bilan kutdi. U joriy yilda “Janublik uy bekalari uchun pazandalik kitobi” va “Tirilish yo‘li” kabi filmlarda suratga tushdi, ammo ularning premyerasini ko‘rish aktyorga nasib etmadi.
Eslatib o‘tamiz, Maykl aktrisa Virjiniya Medsenning tug‘ishgan akasi edi. Aktyorlik faoliyatiga kirishguniga qadar u avtoservis ustasi, yonilg‘i quyish shoxobchasida ishchi, shifoxonada sanitariya xodimi, bo‘yoqchi va oshpaz bo‘lib ishlagan.
Izoh (0)