NATO rahbari Mark Ryutte “Xitoy iltimosiga binoan Rossiya alyans hududiga hujum qilishi mumkin”ligini aytdi. Bu haqda u The New York Times gazetasiga bergan intervyusida ma‘lum qildi.
Agar Xitoy Tayvanga nisbatan kuch ishlatishga qaror qilsa, Xitoy rahbari Si Szinpin Rossiya prezidenti Vladimir Putindan NATO hududiga hujum qilib, yevropaliklarning e’tiborini Hind-Tinch okeani mintaqasidagi vaziyatdan chalg‘itishni so‘rashi mumkin, dedi u.
Ryuttening fikricha, bunday ssenariy ehtimoli tobora ortib bormoqda. Shu munosabat bilan u Pekin va Moskvani tiyib turish uchun ikkita asosiy qadamni zarur deb hisoblaydi.
1. “Rossiya hech qachon hujum qilmasligi uchun” G‘arb ittifoqini jamoaviy kuchaytirish.
2. Hind-Tinch okeani mintaqasi bilan mudofaa sanoati va innovatsiyalar sohasida hamkorlik qilish. Ryutte bunday hamkorlikni prezident Donald Tramp boshchiligidagi AQSH ma’muriyati faol targ‘ib qilayotganini aytdi.
Biz ulkan geosiyosiy muammoga duch kelmoqdamiz. Bu, avvalo, yaqin tarixda misli ko‘rilmagan tezlikda tiklanayotgan Rossiyaga taalluqli. Hozirda ular uch oy ichida NATOning barcha a’zolari bir yilda ishlab chiqaradigan o‘q-dorilardan uch baravar ko‘p miqdorda ishlab chiqarmoqda, deya ta’kidladi u.
Xitoy Rossiyaning Ukrainaga qarshi urushida neytral pozitsiyani egallab keladi va tinchlikka chaqiradi. Mamlakat Moskva bilan faol aloqalarni davom ettirmoqda. Ikki davlat rahbarlari Vladimir Putin va Si Szinpin ko‘p marta uchrashgan. Xitoy Rossiyaning eng yirik savdo sherigi hisoblanadi.
Izoh (0)