Daniyada endilikda ayollar ham erkaklar bilan teng ravishda majburiy harbiy xizmatni o‘tashi shart bo‘ladi. Bu haqda Reuters xabar berdi.
Mazkur qonun 2023-yil iyun oyida parlament tomonidan qabul qilingan bo‘lsa-da, u 2025-yil 1-iyuldan boshlab kuchga kirdi. Yangi tartibga ko‘ra, ushbu sanadan keyin 18 yoshga to‘lgan fuqarolar xizmatga yaroqlilikni aniqlash uchun ro‘yxatdan o‘tishi lozim.
Bungacha ayollar faqat ixtiyoriy ravishda xizmat qilishi mumkin edi. Endilikda esa ular erkaklar bilan bir xil tizim orqali safarbar etiladi — avval ko‘ngillilar tanlanadi, qolgan o‘rinlar esa qur’a tashlash yo‘li bilan to‘ldiriladi.
2024-yil ma’lumotlariga ko‘ra, Daniya armiyasiga yangi safarbar qilinganlarning 24 foizini ko‘ngilli ayollar tashkil etgan. Bu islohot Daniyani Yevropadagi gender-neytral harbiy chaqiruv tizimiga ega kam sonli davlatlardan biriga aylantiradi.
Bundan tashqari, Daniyada harbiy xizmat muddati ham o‘zgaradi. 2026-yildan boshlab muddatli xizmat to‘rt oydan 11 oygacha uzaytiriladi. Dastlabki besh oy davomida askarlar kengaytirilgan boshlang‘ich tayyorgarlikdan o‘tadi, qolgan olti oyda esa ular amaliy mashg‘ulotlarga — quruqlikdagi qo‘shinlar, harbiy-dengiz kuchlari, harbiy-havo kuchlari yoki maxsus bo‘linmalarda xizmatga jalb qilinadi.
Daniya Qurolli kuchlarini kengaytirmoqda
2024-yilda 4700 nafar daniyalik qisqa muddatli harbiy xizmatni o‘tagan. Yangi chaqiruv tartibidan so‘ng bu ko‘rsatkich 2033-yilga kelib 6500 kishiga yetishi kutilmoqda.
Daniya ushbu islohotda ayollar uchun majburiy harbiy xizmatni joriy etgan qo‘shni Norvegiya (2015-yilda) va Shvetsiya (2017-yilda) tajribasidan ilhom oldi. NATO majburiyatlarini bajarish maqsadida Daniya kelgusi besh yil davomida mudofaa xarajatlarini 5,9 milliard dollarga oshiradi.
Hozirda Daniyaning muntazam armiyasida 9 mingga yaqin professional harbiy xizmatchi bor. Mamlakat armiyasidagi chaqiruv dasturi rahbari Kennet Shtrom so‘zlariga ko‘ra, ayollarning safarbar etilishi “xavfsizlik sohasidagi hozirgi vaziyat”dan kelib chiqqan holda amalga oshirilmoqda.
Izoh (0)