Mamlakatga olti oyda 122 ming tonnadan ortiq go‘sht mahsulotlari import qilindi (bir yil avvalgi ko‘rsatkich 75 ming tonna). Bu haqda Bojxona qo‘mitasi eʼlon qilgan jadvalda qayd etilgan.
Joriy yil yanvar—iyun oylarida O‘zbekistonga umumiy qiymati 338,8 ming dollarlik go‘sht mahsulotlari import qilindi. Taqqoslash uchun, 2024-yil mos davridagi import hajmi 193,7 ming dollar bo‘lgan.
Dastlabki olti oyda xorijdan qiymati 266,9 ming dollarlik 66 ming tonna mol go‘shti sotib olingan. Bunda bir kilo go‘sht narxi o‘rtacha 4,04 dollardan to‘g‘ri keladi. O‘tgan yil mos davrida 139,3 ming dollarlik 35,2 ming tonna mol go‘shti import qilingandi.
2025-yilning I yarim yilligida chet eldan qiymati 31,83 ming dollarlik 27,3 ming tonna tovuq go‘shti sotib olingan. O‘z navbatida 15,74 ming dollarlik 15 ming tonna go‘sht submahsulotlari (chorva hayvonlarining go‘shtdan tashqari isteʼmol qilinadigan ichki organlari va tana qismlari) importi amalga oshirilgan. Shuningdek, 14 ming dollarlik 11,1 ming tonna qo‘y go‘shti xarid qilingan.
Bojxona qo‘mitasi joriy yil iyunidagi raqamlarni ham ochiqlagan. O‘tgan oyda mamlakatga jami 70,6 ming dollarlik go‘sht mahsulotlari import qilingan bo‘lsa, shuning 52,9 ming dollarlik qismi mol go‘shtiga to‘g‘ri kelgan. May oyida 71,2 ming dollarlik go‘sht mahsulotlari import qilingan. Shundan 57,8 ming dollarlik qismi mol go‘shti bo‘lgan.
Iyun maʼlumotlarida go‘sht submahsulotlari importi besh karra oshganini ko‘rish mumkin. Mazkur turdagi mahsulotlar importi yillik hisobda qo‘y go‘shti importini ortda qoldirgan. Oy davomida mol go‘shti o‘rtacha 4,01 dollardan, tovuq go‘shti 1,09 dollardan, qo‘y go‘shti esa 1,41 dollardan import qilinganini ko‘rish mumkin.
Izoh (0)