Ispaniyaning qashshoqlik va ijtimoiy izolyatsiyaga qarshi kurash tarmog‘i (EAPN-ES) tomonidan taqdim etilgan 15 yillik “Qashshoqlik holati” hisobotining asosiy xulosaga ko‘ra, mamlakatda qashshoqlik ko‘lami kamaygan bo‘lsa-da, yaxshilanish aholining eng zaif qatlamlariga ta’sir qilmagan.
Ta’kidlanishicha, mazkur hisobot yashash sharoitlarini o‘rganish natijalariga asoslangan. Unga ko‘ra, Ispaniyaning har to‘rtinchi aholisi hamon qashshoqlik yoki izolyatsiya xavfi ostida qolmoqda.
EAPN-ES ma’lumotlariga ko‘ra, Ispaniyada aholining 32 foizi “ishlaydigan qashshoqlik” holatida yashaydi. Bu esa qashshoqlikni bartaraf etish bo‘yicha aniq chora-tadbirlarni amalga oshirishni taqozo etadi.
Hisobotda qayd etilishicha, so‘nggi bir yil ichida qashshoqlik va ijtimoiy izolyatsiya xavfi aholining 26,5 foizidan 25,8 foizigacha pasayib, 12,5 million kishiga (200 ming kishiga kam) ta’sir ko‘rsatgan. Bu 2014-yildan beri eng past ko‘rsatkich hisoblanadi.
“Sezilarli” pasayishga qaramay, EAPN-ES 2014-yildan beri qashshoqlik va ijtimoiy izolyatsiya darajasi aholining 25 foizidan pastga tushmaganidan ogohlantirmoqda. Demak, Ispaniyaning har to‘rtinchi fuqarosi hamon qashshoqlik yoki ijtimoiy izolyatsiya xavfi ostida qolmoqda.
Hisobot mualliflarining fikricha, Ispaniyaning ijtimoiy siyosati eng og‘ir sharoitlarda yashovchi odamlarni himoya qilishga yetarlicha qaratilmagan. Bu esa ularning ahvolini surunkali qilib, qashshoqlikdan chiqish imkoniyatlarini cheklaydi.
Shuningdek, hisobotda Ispaniyada bolalar qashshoqligi darajasi “tashvishli” ekani va Yevropa Ittifoqidagi eng yuqori ko‘rsatkich ekani ta’kidlangan.
Izoh (0)