Kataloniyaning “Barselona” klubi yozgi transfer oynasida hujum chizig‘ini kuchaytirish ustida ish olib bormoqda. Futbol insayderi Reshad Rahmonning yozishicha, klub “Liverpul” futbolchisi Luis Dias va “Manchester Yunayted” hujumchisi Markus Reshfordni o‘z safiga qo‘shib olish uchun harakat qilib ko‘radi.
Manbaga ko‘ra, “Barselona” Diasni sotib olishga tayyor, biroq Reshfordni ijaraga olishni rejalashtirmoqda. Chunki “ko‘k-anorranglilar” ingliz futbolchisining hozirgi holatini yaxshi biladi, shuning uchun katta mablag‘ sarflab, tavakkal qilishni istamaydi. Shu bilan birga, Reshfordning o‘zi ham Ispaniya grandi safiga o‘tishni istamoqda.
Agar bu transferlar amalga oshmasa, klub “Arsenal”ning 23 yoshli futbolchisi Gabriel Martinelli va “Bavariya”ning 28 yoshli hujumchisi Kingsli Komanni zaxira variant sifatida ko‘rib chiqmoqda.
Ma’lumot uchun, yakuniga yetgan mavsumda “Barselona” Ispaniya La Ligasi, Kubogi va Superkubogini qo‘lga kiritdi. Kataloniyaliklar Yevropa Chempionlar Ligasi yarim finalida “Inter”ga umumiy 6:7 hisobida mag‘lub bo‘lib, musobaqani tark etdi.
Izoh (0)