Angliyalik himoyachi Trent Aleksandr-Arnold 2025/26-yilgi mavsumdan boshlab “Real Madrid” a’zosi hisoblanadi. 26 yoshli futbolchi Dani Karvaxal jarohatidan so‘ng muammoga aylangan o‘ng qanot himoyasi uchun yechim bo‘lishi kutilmoqda. Danining yo‘qligida Fede Valverde va Lukas Vaskes kabi futbolchilarni o‘sha pozitsiyada o‘ynashga majbur bo‘ldi.
Aleksandr-Arnoldning kelishi bilan “Real”ning o‘ng qanot himoyasida ikkita yaxshi formadagi futbolchilar paydo bo‘ladi. Endi murabbiy Karvaxal va “Liverpul”dan kelgan yulduz o‘rtasida rotatsiya qilishi mumkin. Biroq, Aleksandr-Arnold o‘zining butun faoliyati davomida kiyib kelgan mashhur 66-raqamdan foydalanolmaydi.
La Liga qoidalari nega bunga ruxsat bermaydi?
Ispaniya chempionatining reglamentiga ko‘ra, asosiy jamoa futbolchilari faqat 1 dan 25 gacha bo‘lgan raqamlarni olishi mumkin. 1, 13 va 23-raqamlar darvozabonlarga ajratilgan bo‘lib, qolganlari boshqa pozitsiyada o‘ynaydigan futbolchilarga ajratilgan. Shunga ko‘ra, Aleksandr-Arnold sevimli 66-raqamida La Liga o‘ynay olmaydi.
Nega u aynan 66-raqamni tanlagan edi?
Aslida, Aleksandr-Arnold 66-raqamni o‘zi tanlamagan. “Liverpul” klubining liboslar menejeri Li Redklif bu holatni quyidagicha tushuntiradi: “Akademiyadan asosiy jamoaga chaqirilgan har bir futbolchiga ataylab yuqori raqam beriladi, bu orqali ular past raqam olish uchun harakat qilishi kerak. Biroq Trent 66-raqamga o‘rganib qoldi va uni almashtirishni xohlamadi.”
Endi u “Real Madrid” safida yangi raqam tanlashi kerak bo‘ladi. Arnold faoliyati davomida boshqa raqamlar bilan ham o‘ynagan: 2-raqam (hozirda Karvaxalda), 15 (Arda Gyuler), 17 (Lukas Vaskes), 18 (Xesus Valyexo). 17 va 18-raqamlar hozirda bo‘sh. Shuningdek, klubni tark etayotgan Luka Modrichning 10-raqami kimga berilishi aniq emas. OAVda yangi mavsum Kilian Mbappe xorvatiyalik futbolchining raqamini olishi haqida xabarlar tarqalgan. Agar bu holat yuz bersa, Mbappening 9-raqami Endrikka o‘tishi kutilmoqda. U holda “Real”da 16-raqam ham bo‘shashi ehtimoli ham bor.
Izoh (0)