AQSHning eng kambag‘al shtatlarida aholi jon boshiga to‘g‘ri keladigan YIM ko‘rsatkichi Yevropaning yetakchi iqtisodiyotlariga (Germaniyadan tashqari) qaraganda yuqoriroq. Bu haqda Euronews xabar berdi.
Missisipi shtatida 2024-yilning uchinchi choragida aholi jon boshiga yalpi ichki mahsulot deyarli 50 ming yevroni tashkil etdi, bu Germaniyadan atigi 1500 yevroga kam.
Missisipidan keyin G‘arbiy Virjiniya, Arkanzas, Alabama va Janubiy Karolina turadi. Ularning barchasi Ispaniya, Italiya va Fransiya kabi Yevropaning yirik iqtisodiyotlaridan ustunlik qilmoqda.
Nyu Yorkda aholi jon boshiga YIM 107 ming yevrodan oshgan, Kolumbiya okrugi esa 246 523 yevro ko‘rsatkich bilan yetakchilik qilmoqda.
Yevropada aholi jon boshiga YIM ko‘rsatkichlari turlicha: Bolgariyada atigi 15 773 yevro bo‘lsa, Lyuksemburgda 125 ming yevrodan ortiq. Yevropa ittifoqi bo‘yicha o‘rtacha ko‘rsatkich 40 ming yevrodan sal ko‘proqni tashkil etadi. AQSHda esa bu 80 mingdan ortiq.
Aholi jon boshiga YIM ko‘rsatkichi bo‘yicha Yevropaning beshta yetakchi davlati orasida Germaniya 51 304 yevro bilan birinchi o‘rinda turadi. Undan keyin Buyuk Britaniya (yevroga nisbatan 48 441), Fransiya (44 365 yevro), Italiya (37 227 yevro) va Ispaniya (33 070 yevro) egallagan.
Xarid qobiliyati pariteti (XQP) bo‘yicha qayta hisoblanganda, hayot qiymatidagi farqni hisobga oluvchi tafovut kamayadi. Biroq AQSH hamon Yevropa ittifoqi va Britaniya mamlakatlaridan oldinda turadi, faqat Lyuksemburg va Irlandiya bundan mustasno. Ular Lyuksemburgdagi ko‘plab xorijiy ish beruvchilar va Irlandiyadagi Amerika transmilliy korporatsiyalarining soliq strategiyalari tufayli istisno hisoblanadi.
YIM mamlakat iqtisodiy ishlab chiqarishining umumiy hajmini o‘lchasa, XQP esa mamlakatlar o‘rtasidagi narxlar farqini to‘g‘rilab, turmush darajasi haqida aniqroq tasavvur beradi. Mutaxassislar prognoziga ko‘ra, Germaniyada YIM o‘sishga qaytib, 2025-yilda 0,7 foizga, 2026-yilda esa 1,3 foizga ko‘tariladi.
Izoh (0)