“Armiyamiz keng ko‘lamli urushga tayyor va Suriyaga zarba berishni davom ettiramiz” — Isroil Bosh shtabi rahbari

Isroil mudofaa armiyasi Bosh shtabi boshlig‘i, general-leytenant Eyal Zamir harbiylar xavfsizlik bilan bog‘liq “murakkab va keskin” vaziyatda uzoq davom etadigan ko‘p qirrali kampaniyaga tayyor bo‘lishi lozimligini bildirdi.

U buning sababini G‘azoda janglar davom etayotgani va Isroil chegaralari bo‘ylab keskinlik kuchayib borayotgani bilan bog‘lagan.

Deyarli ikki yil ichida ilk bor o‘tkazilgan noyob ko‘p frontli vaziyatni baholash jarayonida Zamir va yuqori martabali generallar barcha jabhalardagi operativ, razvedka va strategik holatni ko‘rib chiqqan.

“Isroil mudofaa armiyasi bir vaqtning o‘zida har bir sektorda va chegaralarimiz bo‘ylab hayotiy mudofaani ta’minlagan holda bir nechta yo‘nalishlarda hujum harakatlarini olib borishi shart. Biz havoda ustunlikni saqlab qolish va razvedka faoliyatini rivojlantirishda davom etamiz”, deydi general-leytenant.

U G‘azodagi urushni “SAHAL duch kelgan eng qiyin urushlardan biri” deb ta’riflar ekan, harbiylarning yutuqlarini yuqori baholagan. Shu bilan birga, so‘nggi paytlarda G‘azoda askarlar o‘limi ko‘payganini ta’kidlab, mojaro natijasida katta yo‘qotishlar bo‘lganini tan olgan.

Bosh shtab boshlig‘ining aytishicha, Isroil Damashq va “Hizbulloh”ning kuchayishiga yo‘l qo‘ymaslik uchun Suriyadagi nishonlarga zarba berishni davom ettiradi. Uning ta’kidlashicha, zarbalar “Isroil armiyasining harakat erkinligini himoya qilish maqsadida” davom etadi.