Исроил мудофаа армияси Бош штаби бошлиғи, генерал-лейтенант Эял Замир ҳарбийлар хавфсизлик билан боғлиқ “мураккаб ва кескин” вазиятда узоқ давом этадиган кўп қиррали кампанияга тайёр бўлиши лозимлигини билдирди.
У бунинг сабабини Ғазода жанглар давом этаётгани ва Исроил чегаралари бўйлаб кескинлик кучайиб бораётгани билан боғлаган.
Деярли икки йил ичида илк бор ўтказилган ноёб кўп фронтли вазиятни баҳолаш жараёнида Замир ва юқори мартабали генераллар барча жабҳалардаги оператив, разведка ва стратегик ҳолатни кўриб чиққан.
“Исроил мудофаа армияси бир вақтнинг ўзида ҳар бир секторда ва чегараларимиз бўйлаб ҳаётий мудофаани таъминлаган ҳолда бир нечта йўналишларда ҳужум ҳаракатларини олиб бориши шарт. Биз ҳавода устунликни сақлаб қолиш ва разведка фаолиятини ривожлантиришда давом этамиз”, дейди генерал-лейтенант.
У Ғазодаги урушни “СAHAЛ дуч келган энг қийин урушлардан бири” деб таърифлар экан, ҳарбийларнинг ютуқларини юқори баҳолаган. Шу билан бирга, сўнгги пайтларда Ғазода аскарлар ўлими кўпайганини таъкидлаб, можаро натижасида катта йўқотишлар бўлганини тан олган.
Бош штаб бошлиғининг айтишича, Исроил Дамашқ ва “Ҳизбуллоҳ”нинг кучайишига йўл қўймаслик учун Суриядаги нишонларга зарба беришни давом эттиради. Унинг таъкидлашича, зарбалар “Исроил армиясининг ҳаракат эркинлигини ҳимоя қилиш мақсадида” давом этади.
Изоҳ (0)