Janubiy Afrikaning yirik muxolifat “Umkonto ve sizve” partiyasi Milliy assambleyaga (parlamentning quyi palatasi) mamlakatning amaldagi prezidenti Siril Ramaposaga politsiya ishlari vazirligidagi vaziyat munosabati bilan ishonchsizlik votumi haqidagi qaror loyihasini taqdim etdi. Bu haqda partiya parlament fraksiyasi rahbari Kollin Makxubele ma’lum qildi.
“Partiyamiz prezidentga uning xatolari, ayniqsa politsiya ishlari vaziri Senzo Mchunani ishdan bo‘shata olmagani va jamiyatimizning eng zaif a’zolarini himoya qila olmagani uchun ishonchsizlik votumi haqidagi qaror loyihasini kiritdi. Biz o‘z harakatlarimiz muvaffaqiyatli bo‘lishiga ishonamiz”, dedi u brifingda.
Uning qo‘shimcha qilishicha, hozirda qaror loyihasini qo‘llab-quvvatlash uchun boshqa parlament partiyalari bilan maslahatlashuvlar olib borilmoqda.
JAR sobiq prezidenti Jeykob Zuma boshchiligidagi Umkonto ve sizve” partiyasi Milliy assambleyada 58 ta deputatlik o‘ringa ega. Qaror loyihasi qabul qilinishi uchun deputatlarning yarmidan ko‘pining ovozi kerak bo‘ladi. Palata 400 nafar deputatdan iborat.
13-iyul kuni Ramaposa xalqqa murojaat qilib, jinoyat olamiga aloqadorlikda ayblanayotgan politsiya ishlari vaziri Senzo Mchunani ta’tilga yuborganini ma’lum qildi. Shuningdek, davlat rahbari o‘z ko‘rsatmasi bilan politsiya xodimlari, siyosatchilar, sudyalar va tadbirkorlarga nisbatan jinoyat olami bilan aloqadorlik bo‘yicha ayblovlarni tekshirish uchun maxsus komissiya tuzilganini aytdi. Komissiya keyingi uch oy ichida prezidentga o‘zining dastlabki hisobotini taqdim etishi lozim.
Izoh (0)