AQSHning Ford avtogiganti yonilg‘i sizib chiqishi muammosi tufayli 694 ming 271 ta krossoverini qaytarib olishga qaror qildi. Bu haqda AQSH Yo‘l harakati xavfsizligi milliy boshqarmasiga (NHTSA) asoslanib, Reuters axborot agentligi xabar berdi.
Ma’lum qilinishicha, ushbu qaror qabul qilinishidan oldin bir yillik tergov o‘tkazilgan. Tergov natijasida qaytarib olinishi kerak bo‘lgan avtomobillardagi yonilg‘i forsunkalarining yorilish ehtimoli aniqlangan. Bu esa yonilg‘ining dvigatel bo‘limiga sizib chiqishi va yong‘in chiqishiga sabab bo‘lishi mumkin.
2021-2024-yillarda ishlab chiqarilgan Bronco Sport va 2020-2022-yillarda ishlab chiqarilgan Escape rusumidagi 1,5 litrli dvigatellar bilan jihozlangan ba’zi modellarni qaytarib olish rejalashtirilgan. Boshqarma ushbu nuqson avtomobillarning 0,3 foizida uchrashi mumkinligini taxmin qilmoqda. Qaytarib olish jarayonining umumiy qiymati avtogigantga taxminan 570 million dollarga tushadi.
Yo‘l harakati xavfsizligi milliy ma’muriyati ma’lumotlariga ko‘ra, Ford yonilg‘i purkagichlari muammosini 2022-yildan beri o‘rganmoqda. Kompaniyaning joylardagi tekshiruv qo‘mitasi 2022-yil noyabr, 2024-yil mart va 2025-yil mart oylarida qaytarib olishni ma’qullagan. Bu davrda kompaniya dasturiy ta’minot yangilanishlarini amalga oshirgan.
Agentlikning ta’kidlashicha, muammoli avtomobil ehtiyot qismlari Italiyaning Dumarey Flowmotion Technologies kompaniyasi tomonidan yetkazib berilgan. Iyul oyida Ford sakkizta avtomobilning yonilg‘i purkagichlari yorilganini aniqladi. Bu avtomobillar ta’mirlanganiga qaramay, kapot ostida yong‘in chiqdi.
Izoh (0)