O‘zbekistonda 2025 yil yanvar—iyun oylarida 311 ming tonna 368,6 mln dollarlik meva eksport qilingani ma’lum bo‘ldi.
AOKAda o‘tkazilgan brifingda Agrosanoatni rivojlantirish agentligi Axborot xizmati rahbari O‘g‘iloy Boltaboyeva joriy yilning o‘tgan davrida O‘zbekistonning meva eksport yo‘nalishida erishilgan natijalar to‘g‘risida ma’lumot berdi. Unga ko‘ra, har yili respublikada 3,4 mln tonna meva va 1,9 mln tonna uzum yetishtiriladi, 2024-yilda 2,3 mlrd dollarlik meva-sabzavot va oziq-ovqat mahsulotlari (shundan, 1,5 mlrd dollarlik meva-sabzavot) eksport qilindi.
Joriy yil yanvar—iyun oylarida meva eksportyorlari tomonidan jami eksport qilingan meva eksportining 11 foizi 96,8 mln dollarlik gilos (42,1 ming tonna), 3,6 foizi 6,7 mln dollarlik olma (13,3 ming tonna), 3,9 foizi 10 mln dollarlik olxo‘ri (14,6 ming tonna), 15 foizi 41 mln dollarlik o‘rik (54,1 ming tonna) tashkil etadi.
2025-yilda jami 10 ta agrologistika markazi ishga tushirilishi belgilangan bo‘lib, bugunni kunda 4 tasi foydalanishga topshirildi. Jumladan, Surxondaryo, Navoiy, Samarqand va Farg‘ona viloyatlarida 1 ta dan agrologistika markazlari ishga tushirildi.
Olti oy davomida O‘zbekiston eksporti hajmi 16,9 mlrd dollarni tashkil etib, o‘tgan yil mos davridagidan 33 foizga o‘sdi. Bunda tovar va xizmatlar eksporti 10,4 mlrd dollarga yetib (oltinsiz), yillik hisobda 23 foizga oshdi.
Eksport o‘sishiga meva-sabzavotlar (40 foiz), zargarlik buyumlari (4,6 baravar), uran (23 foiz), qurilish materiallari (17 foiz), un (42 foiz), farmatsevtika mahsulotlari (20 foiz), turizm (54 foiz), axborot (93 foiz) va transport xizmatlari (22 foiz) tushumlari ortishi turtki bergan.
Hududlar miqyosida Toshkent shahri eksporti hajmi eng ko‘p o‘sdi — 493 mln dollar (31 foiz).
Izoh (0)