O‘zbekistonda tez buziladigan meva-sabzavotlarni eksport qilishda bojxonada alohida yo‘laklar tashkil etiladi.
Bojxona qo‘mitasi matbuot xizmatining xabar qilishicha, meva-sabzavot mahsulotlari eksportini ustuvor tartibda tezkorlik bilan amalga oshirish uchun maxsus belgilar bilan jihozlangan alohida yo‘laklar tovar va transport vositalari harakati yuqori bo‘lgan yirik chegara-bojxona postlarida tashkil etiladi.
Bunda tez buziluvchan meva-sabzavot mahsulotlari (piyoz, karam, gilos, o‘rik va boshqalar) ortilgan transport vositalarini ushbu yo‘laklarga yo‘naltirishda ustuvorlik taʼminlanadi.
Eksportga yo‘naltirilayotgan tez buziluvchan meva-sabzavot mahsulotlari ortilgan transport vositalariga xalqaro standartlarga mos bo‘lgan farqlash belgisini (avtotransport vositasining old oyna o‘ng tomoniga) o‘rnatish tavsiya qilinadi.
“Bu chegara-bojxona postlarida ushbu transport vositalarini alohida yo‘lakka yo‘naltirishda muhim rol o‘ynaydi”, — deyiladi xabarda.
Bundan bir necha kun avval Sirdaryo, Yallama va Najimov chegara-bojxona postlarining O‘zbekiston bilan chegaradosh tomonida tirbandliklar mavjudligi, ichi to‘la meva bo‘lgan furalar 2 kundan beri chiqarilmayotgani haqida xabarlar tarqalgandi. Bojxona qo‘mitasi qishloq xo‘jaligi mahsulotlarini chegara-bojxona postlarida navbatsiz rasmiylashtirish yo‘lga qo‘yilganini bildirgandi.
Izoh (0)