O‘zbekiston, Ozarbayjon va Qozog‘iston respublikalari energetika kompaniyalari tomonidan “yashil koridor” loyihasi bo‘yicha qo‘shma korxona tashkil etildi, deb xabar bermoqda “O‘zbekiston milliy elektr tarmoqlari” matbuot xizmati.
Ma’lum qilinishicha, 1-iyul kuni Ozarbayjonning Azerenerji OAJ, O‘zbekistonning “O‘zbekiston milliy elektr tarmoqlari” AJ va Qozog‘istonning KEGOC AJ vakillari Bokuda faoliyat yuritadigan Green Corridor Alliance MCHJ qo‘shma korxonasini ta’sis etish va uning ustavini tasdiqlash to‘g‘risidagi bitimni imzoladi.
Loyihaning amalga oshirilishi Yevropaga “yashil” energiya eksportini amalga oshirilishida muhim ahamiyat kasb etadi.
Ozarbayjon, Qozog‘iston va O‘zbekiston o‘rtasida “yashil koridor” loyihasi
2023-yilning noyabrida Bokuda elektr energiyasini ishlab chiqarish va eksport qilish masalalari bo‘yicha O‘zbekiston, Ozarbayjon va Qozog‘iston vazirlari uch tomonlama uchrashuvi bo‘lib o‘tgandi. Unda tomonlar Ozarbayjon orqali Markaziy Osiyo davlatlaridan Yevropaga elektr energiyasini eksport qilish imkoniyatlarini ko‘rib chiqqan. O‘zbekiston, Ozarbayjon, Qozog‘iston Yevropaga “yashil” energiya eksport qilish bo‘yicha texnik shartlarni tayyorlashga, shuningdek, loyihani amalga oshirish uchun qo‘shma korxona yaratish istiqbollarini o‘rganishga kelishilgandi.
2024-yil noyabrida O‘zbekiston, Ozarbayjon va Qozog‘iston rahbarlari “yashil” energiyani rivojlantirish va uzatish loyihasiga start berdi. Tadbirda so‘zga chiqqan Shavkat Mirziyoyev qayta tiklanuvchi energiya iqtisodiy maqsad emas, balki kelajakka qo‘shilayotgan hissa, kelgusi avlodlar oldidagi masʼuliyat tuyg‘usining natijasi ekanligini taʼkidladi.
Energetika vazirligi rahbari Jo‘rabek Mirzamahmudov Kaspiy dengizi tubi bo‘ylab elektr kabelini o‘tkazish bo‘yicha Qozog‘iston—O‘zbekiston—Ozarbayjon qo‘shma uch tomonlama loyihasi muvaffaqiyatli amalga oshirilsa, O‘zbekiston 2030-yildan boshlab ortiqcha elektr energiyasini Yevropaga eksport qila olishini aytgandi.
2024-yil dekabrida mamlakatlarning tizim operatorlari (O‘zbekistondan — “O‘zbekiston milliy tarmoqlari” AJ, Qozog‘istondan — “KEGOC” AJ, Ozarbayjondan — Azerenerji OAJ) tomonidan “Yashil yo‘lak” loyihasi doirasida ta’sis shartnomasi imzolandi. Tomonlar Ozarbayjonning Boku shahrida loyihani amalga oshirish bo‘yicha qo‘shma korxona tashkil etish taklifini qabul qildi.
Prezidentning 2025-yil 14-martdagi qarori bilan Ozarbayjon, Qozog‘iston va O‘zbekiston o‘rtasida “yashil” energiyani rivojlantirish va uzatish sohasida strategik sheriklik to‘g‘risidagi bitim tasdiqlandi.
Uzatiladigan energiya — bu shamol va quyosh energiyasi bo‘lib, qayta tiklanadigan va toza manba hisoblanadi hamda iqlimga taʼsirni yumshatish imkonini beradi.
Izoh (0)