Telegram messenjeridagi kanallarda “Sirdaryo”, “Yallama” va “Najimov” chegara-bojxona postlarining O‘zbekiston bilan chegaradosh tomonida tirbandliklar mavjudligi, ichi to‘la meva bo‘lgan furalar ikki kundan beri chiqarilmayotgani haqida xabarlar tarqalgandi. Shundan so‘ng Bojxona qo‘mitasi qishloq xo‘jaligi mahsulotlarini chegara-bojxona postlarida navbatsiz rasmiylashtirish yo‘lga qo‘yilganini ma’lum qildi. Bu holatga qiziqish bildirgan OAV vakillari uchun press-tur tashkil etib, jarayon haqida ma’lumot berdi.
Bojxona qo‘mitasining bo‘lim boshlig‘i Elyor Hakimovning ma’lumot berishicha, chegara-bojxona postlaridagi tirbandliklar haqiqatan mavjud bo‘lib, aynan tarmoqlarda tarqalgan videolardan so‘ng buning oldini olish choralari ko‘rilgan.
Har yili odatda shunaqa holatlar kuzatiladi. Shu bois bojxona organlari tomonidan buning oldini olish choralari ko‘riladi. Biz bugun jurnalistlarga joriy mavsumda nima qilingani haqida ma’lumot bermoqchimiz, — deydi tarmoqlarda tarqalgan holatni tasdiqlagan mas’ul.
Bildirilishicha, O‘zbekistondagi mavjud eng katta chegara-bojxona postlaridan biri bo‘lmish “Yallama”da import uchun 6 ta, eksport uchun 5 ta yo‘lak tashkil etilgan.
Odatiy vaqtlarda “Yallama” chegara-bojxona postidan kuniga 400-500 ta yuk avtomobili harakatlangan bo‘lsa, pishiqchilik paytida bu ko‘rsatkich 1000-1500 taga chiqadi. Shu sabab joriy mavsumda qishloq xo‘jaligi mahsulotlari uchun “yashil” yo‘lak tashkil etildi. Alohida tezkor shtab tuzilib, chegara-bojxona postlariga 100 nafar xodimdan iborat qo‘shimcha kuch safarbar etildi, — deydi qo‘mita bo‘limi boshlig‘i.
Ta’kidlanishicha, ayni kunda qishloq xo‘jaligi mahsulotlari ortilgan yuk avtomobillari postlarda tashkil etilgan yashil yo‘laklar orqali chegaradan tez va oson, shuningdek qisqa fursatlarda chiqib ketishga muvaffaq bo‘lmoqda.
Postning ichkarisida avtotransportlar harakatini tartibga keltirib, ayniydigan oziq-ovqat mahsulotlari ortilgan yuk avtomobillarini navbatsiz o‘tkazib yuborish judayam oson. Bu bojxona xodimlari tomonidan amalga oshiriladi. Biroq postgacha bo‘lgan hududda haydovchilarning barchasi ham buni to‘g‘ri tushunmaydi. Deylik, boshqa yuk ortilgan yuk avtomobili haydovchisi o‘zidan keyin kelgan, ayniydigan oziq-ovqat mahsulotlari ortilgan yuk avtomobilini o‘tkazishga qarshilik qilishi mumkin. Shunday paytlarda bojxona organlari tomonidan tashkil etilgan yangi tizim ish bermoqda. Ya’ni ayniydigan mahsulotlar ortilgan yuk avtomobillariga alohida belgilar o‘rnatilib, ular navbatsiz o‘tishi mumkinligi haqida e’lonlar berilmoqda. Qolaversa, YPX xodimlari va bojxona inspektorlari tomonidan haydovchilarga to‘g‘ri tushuntirishlar berilib, shunday mahsulotlar ortilgan yuk avtomobillarini kuzatuv asosida navbatlarsiz o‘tkazib yuborishmoqda, — deydi mas’ul.
Qo‘mita vakilining jurnalistlarga ma’lumot berishicha, joriy mavsumda eksportga chiqarilayotgan oziq-ovqat mahsulotlari o‘tgan yilning mos davriga nisbatan solishtirilganida 20 foizga ortgan.
Ayni kunda ob-havoning qulay kelishi ham tadbirkorlarga qo‘l kelmoqda. Ular shu paytdan foydalanib, asosan piyoz, gilos kabi tez ayniydigan mahsulotlarini xorijlik xaridorlarga yetkazib berishga harakat qilmoqda, — deydi u.
Bojxona qo‘mitasi axborot xizmati rahbari Husan Tangriyevning OAV vakillariga bildirishicha, prezident Shavkat Mirziyoyev mas’ullarga 2024-yilda qishloq xo‘jaligi mahsulotlari eksportidan tushayotgan daromadni 3,5 milliard dollarga yetkazish bo‘yicha topshiriq bergan.
2023-yilda bu raqam 2 milliard dollar bo‘lganini inobatga olsak, demak bu yil oldimizga juda katta marra qo‘yilgan. Tabiiyki, bunga erishish oson emas. 2017-yildan keyingi tendensiyani kuzatadigan bo‘lsak, yildan-yilga faqatgina 2020-yildagi pandemiya davrini hisobga olmaganda tashqi savdo yuklari ortilgan transport vositalari soni sezilarli darajada oshib borayotganini ko‘rish mumkin. Bu raqamlar qishloq xo‘jaligi mahsulotlari eksporti davriga kelganda yanada oshadi. Bu jarayon bojxonada tezkor chora-tadbirlar ko‘rishni taqozo etadi, — deydi Bojxona qo‘mitasi axborot xizmati rahbari Husan Tangriyev.
OAV vakillari bilan suhbatda bo‘lgan yuk avtomobillari haydovchilari Davron Eshmurodov hamda Salim Burxonov ayni kundagi imkoniyatlar ularning ishini yengillashtirib, og‘irini yengil qilayotganini aytmoqda.
Bugun 15-20 daqiqada postga yetib kelib, ishlarimni bitkazib, chiqib ketishga tayyor bo‘lib turibman. Postgacha bo‘lgan hududda haydovchilar ham vaziyatni to‘g‘ri tushunib, bizga yo‘l berishmoqda. Piyoz ortilgan mashinam bilan qiynalmasdan, ishlarimni tez bitiryapman. Bojxona xodimlari ham xushmuomala bo‘lib, ishimizni tez bitirishmoqda, — deydi haydovchilar.
Aniqlashtirilishicha, “Yallama” postidan yuk chiqarayotgan haydovchi Salim Burxonov 23 tonna piyoz ortilgan yuk mashinasida yuk ortilgan manzildan chiqib, chegaradan chiqib ketguncha 5 soat vaqt sarflagan.
Ilgari xuddi shunday yukni ortib, manzilga tashlab kelguncha 20-22 kun vaqtimiz ketar edi. Bojxona postlarida 4-5 kunlab qolib ketardik. Bugun yukni ortib, chegara-bojxona postidan chiqquncha 5 soat vaqt yetarli bo‘ldi. Biz bundan xursandmiz, — deydi yuk avtomobili haydovchisi Salim Burxonov.
Qo‘shimcha qilinishicha, ayni kunda “Sirdaryo” va “Najimov” chegara-bojxona postlarida, shuningdek o‘zbekistonlik mas’ullar taklifiga binoan Qozog‘istondagi aynan shu chegara-postlari bilan yonma-yon joylashgan postlarda ham qurilish ta’mirlash ishlari olib borilmoqda. Tez orada mazkur hududlarda ham yetarli darajadagi shart-sharoitlar yaratiladi.
Izoh (0)