Ijtimoiy tarmoqlarda Qozog‘istonga eksport bo‘lgan pomidorda karantin obyekti hisoblangan virus (Tomato brown rugose fruit virus ToBRFV) aniqlangani tufayli mahsulot O‘zbekistonga qaytarilgani haqida xabarlar tarqaldi. Qishloq xo‘jaligi vazirligi mazkur xabarlarga izoh berdi.
Unga ko‘ra, yuz bergan holatga oydinlik kiritish maqsadida tezkor surishtiruv o‘tkazildi. Mahsulotni eksport qilgan tadbirkorlik subyekti pomidor O‘zbekistonga qaytarilmaganini ma’lum qildi. Aniqlanishicha, Qozog‘istonga yuk mashinasida 450 kilogramm yangi uzilgan gilos, 14,5 tonnadan ortiq olma va 4,2 tonna pomidor jo‘natilgan. Mahsulotlar Toshkent viloyatining Qibray tumanida yetishtirilgan.
Tartibga asosan meva-sabzavotlarni eksportga yo‘naltirishdan avval ichki fitosanitar sertifikat rasmiylashtirib beriladi. Pomidor eksportida asosiy talablardan biri mahsulotning zararli organizmlardan, jumladan, “pomidor jigarrang bujmayish virusi”dan (Tomato brown rugose fruit virus ToBRFV) xoli hisoblanadi.
Shu sababli har bir partiyadan 5 donadan 1 kilogrammgacha namuna sifatida olinib, laboratoriya sharoitida PZR usulida tekshiriladi. Namunalar toza chiqsagina, Markaziy fitosanitariya laboratoriyasining mutaxassislari tomonidan ijobiy xulosa beriladi va ichki sertifikat asosida xalqaro namunadagi fitosanitariya sertifikati rasmiylashtiriladi.
Qozog‘istonga jo‘natilgan pomidordan ham namuna olingan va tegishli tartibga asosan laboratoriyada PZR usulida ekspertiza o‘tkazilgan. Ekspertiza natijalariga ko‘ra, pomidor mahsulotida “jigarrang bujmayish virusi” (Tomato brown rugose fruit virus ToBRFV) aniqlanmagan.
Shu sababli qozog‘istonlik hamkasblarga laboratoriya ekspertizasini o‘tkazish metodologiyasi, o‘tkazilgan tahlillarning praymerlari, video va fotosuratlari taqdim etilishi yuzasidan so‘rovnoma jo‘natildi. Shuningdek, tekshiruv davomida yuklangan mahsulot bir dalada yetishtirilmagani va turli dehqon xo‘jaliklaridan yig‘ib olingani ma’lum bo‘ldi. Vaziyatni joyida o‘rganish maqsadida ishchi guruh shakllantirib, Toshkent viloyatining Qibray tumaniga jo‘natildi.
Zararlangan ekin maydoni aniqlanib, zaruriy choralar amalga oshirilishi belgilandi.
Izoh (0)