Yelisey saroyi Fransiya prezidenti Emmanuel Makronning rafiqasi Brijitdan tarsaki yegani aks etgan videoning haqiqiyligini tasdiqladi. Manbalarga ko‘ra, bu “yaqinlik lahzasi” bo‘lgan, deya xabar bermoqda RMC nashri.
Aslida nima bo‘lgandi?
Voqea yakshanba kuni kechqurun Fransiya prezidenti samolyoti rasmiy tashrif bilan kelgan Xanoy aeroportiga qo‘nganida yuz berdi. Samolyot eshigi er-xotin muxbirlarga ko‘rinish berishga tayyor bo‘lishidan oldinroq ochildi.
Associated Press e’lon qilgan tasvirlarda prezident samolyoti eshigida avval Makron ko‘rinadi. So‘ngra boshqa bir shaxs unga tarsaki tushiradi. Bundan keyin prezident jurnalistlar oldiga chiqib, birinchi xonimga qo‘lini uzatadi, ammo u erining yordamini qabul qilmaydi.
OAVning bunga reaksiyasi
Voqea tasvirlari bir zumda ijtimoiy tarmoqlarda tarqaldi. Daily Mail bu tasvirlarni “dahshatli” deb atab, Makronning rafiqasi “uning yuziga qo‘l tekkizganini” ta’kidladi. The Telegraph nashrining yozishicha, “Fransiya prezidenti rafiqasi uni turtib yuborganidan so‘ng hayron qolganday ko‘ringan”.
Dastlab Yelisey saroyi tasvirlar ishonchsiz ekanligini va ular sun’iy intellekt tomonidan yaratilgan bo‘lishi mumkinligini ma’lum qildi. Ma’muriyat vakillari videolarni Rossiyaga xayrixoh kanallar tarqatayotganini aytdi.
Biroq 26-may kuni Yelisey saroyi videoning haqiqiyligini tasdiqladi. Avvaliga matbuot xizmati er-xotin “shunchaki hazillashganini” aytdi.
Ammo keyinroq manba bu oddiy er-xotin janjali ekanini tasdiqlab, “bu yerda hech qanday fitna nazariyalarini o‘ylab topish shart emas”ligini ta’kidladi.
Keyinchalik Makronning o‘zi ham oiladagi kelishmovchilik haqidagi mish-mishlarni inkor etdi.
“Xotinim bilan tortishamiz, hazillashamiz. Bu oddiy holat ba’zilar tomonidan global falokatga aylantirilmoqda, hatto ayrimlar turli nazariyalar o‘ylab topishmoqda. Bularning barchasi bema’nilik”, degan prezident.
“Bu bir necha daqiqa davom etdi. Menimcha, u bundan xafa bo‘lmadi. Bu Fransiya imiji uchun yaxshi, deb o‘ylayman”, degan birinchi xonimning o‘zi.
Fransiya prezidentining Janubi-Sharqiy Osiyoga bir haftalik tashrifi boshlandi. Vyetnamdan so‘ng u Indoneziya va Singapurga bormoqchi. Ushbu safar mintaqada iqtisodiy va diplomatik aloqalarni mustahkamlashga qaratilgan.
Brijit Makron haqida nimalar ma’lum?
Brijit Makron (qizlik familiyasi Tronye) eridan 24 yosh katta. U mashhur Amyen shahrining qandolatchi oilasida tug‘ilgan. Uning ajdodlari 1872-yilda bu shaharda o‘rnashib, shokolad mahsulotlari va makaron pechenyesining mahalliy turini ishlab chiqarish bilan dong taratgan. Brijit olti farzandning eng kenjasi bo‘lib, ancha erkin tarbiya topgan. 21 yoshida muvaffaqiyatli bankir Andre Lui Ozyer bilan oila qurgan va ularning uchta farzandi dunyoga kelgan.
Emmanuel Makron xotini bilan Amyendagi litseyda o‘qiyotgan paytida tanishgan. Tronye unga fransuz tilidan dars berardi, turmush qurgan va uch farzandli ayol bo‘lishiga qaramay, ular o‘rtasida mehr paydo bo‘lgan. Makronning ota-onasi o‘g‘lining o‘qituvchisi bilan aloqasini uzish maqsadida uni Parijga o‘qishga yuborishga qaror qilganda, u sevgilisiga albatta uylanishga va’da bergan. Makron so‘zida turdi — ular 2007-yilda turmush qurishdi. Bugungi kunda Brijit Makron yetti nabiraning buvisi.
2024-yil oktyabr oyida Fransiya prezidenti Variety jurnali bilan suhbatda Brijit Makron Netflix’ning “Emili Parijda” serialining to‘rtinchi mavsumida rol ijro etganini ma’lum qildi. Birinchi xonim u yerda epizod, ya’ni o‘zining rolini ijro etgan.
Emmanuel Makron Fransiya tarixidagi eng yosh prezident hisoblanadi: u 39 yoshida lavozimga kirishgan bo‘lib, hozirda 47 yoshda. U ijtimoiy tarmoqlarni faol yuritadi, prezidentning “parda ortidagi” hayoti esa uning shaxsiy fotosuratchisi Soazig de la Muassonyer suratlaridan ma’lum. U televideniyeda ko‘rsatilmaydigan prezident hayotining sahna ortidagi holatlarini suratga oladi. Makronning ko‘plab norasmiy suratlari ijtimoiy tarmoqlarda keng muhokamaga sabab bo‘lmoqda va hatto memlarga aylanib ketmoqda.
Izoh (0)