Fransiya prezidenti Emmanuel Makron “Emili Parijda” serialini suratga olish ishlari rejissyorlar reja qilganidek Italiyada emas, balki Fransiyada bo‘lib o‘tishiga va’da berdi. Bu haqda prezident Variety nashriga bergan intervyusida aytib o‘tdi.
Avvalroq Netflix tomonidan suratga olinayotgan loyihaning to‘rtinchi qismi Rimda bo‘lib o‘tishi ma’lum bo‘lgan edi. Bundan xabar topgan prezident film rejissyorlariga qarata murojaat qildi:
“Biz rejissyorlardan Parijda qolishlarini so‘raymiz va bunga imkon qadar qat’iyat va kuch bilan kurashamiz! Rimda “Emili Parijda” filmini suratga olish mantiqqa to‘g‘ri kelmaydi”, dedi Makron.
Fransiya prezidenti intervyuda film haqida so‘zlar ekan, Makronning rafiqasi to‘rtinchi mavsumda ishtirok etganini ham aytib o‘tdi:
“Men rafiqamdan juda faxrlanaman va Brijit xonim bu loyihada qisqa vaqtga bo‘lsa ham ishtirok etganidan mamnunman. U filmda atigi bir necha daqiqaga paydo bo‘ladi, lekin fikrimcha, suratga tushish ishlari rafiqam uchun juda foydali tajriba bo‘ldi. Qolaversa, bu Fransiyaning imijiga ijobiy ta’sir ko‘rsatadi”, dedi Makron.
Variety nashri jurnalisti Emmanuel Makrondan serialda nega prezidentning o‘zi ham ishtirok etmagani haqidagi savolga prezident javoban: “Men Brijit kabi kelishgan emasman”, dedi.
The Guardian nashrining yozishicha, “Emili Parijda” filmi sababli mamlakatga ko‘plab sayyohlar jalb qilinmoqda, savdo-sotiq rivojlanmoqda va Parijdagi ko‘chmas mulklarga bo‘lgan talablar ortib bormoqda.
Serialda bosh rolni gavdalantirayotgan aktrisa Lili Kollinzning aytishicha, syomkaga Fransiya prezidentining rafiqasini taklif qilish g‘oyasi 2022-yilda muallif Darren Starda paydo bo‘lgan. O‘shanda ular Makron bilan Yelisey saroyida uchrashgan.
Biroq fransuzlar “Emili Parijda” serialining yangi qismlari suratga olinishiga qarshilik bildirmoqda. Poytaxt aholisiga syujet bo‘yicha bosh qahramon yashaydigan tumanga sayyohlar oqimining yopirilishi unchalik yoqmagan. Tomoshabinlarning aksariyati loyihani Fransiyaning stereotip manzarasini ko‘rsatib bergani uchun filmni tanqid ostiga olmoqda.
Izoh (0)