Madridning “Real” klubi 2025-yilgi yozgi transfer oynasi davomida bir nechta futbolchilari bilan xayrlashishi mumkin. Bu haqda ispan nashri Diario AS xabar bermoqda.
Manbaga ko‘ra, klubni tark etishi mumkin bo‘lgan futbolchilar ro‘yxatiga quyidagilar kirgan: Rodrigo Goes, Fran Garsiya, David Alaba va Dani Sebalyos. So‘nggi paytlarda Rodrigo o‘ziga ko‘proq o‘yin amaliyoti berilmayotganidan norozi bo‘lmoqda. Shu bois braziliyalik vinger klubdan ketishni istamoqda. Hozirda unga Angliya Premyer Ligasining “Arsenal” va “Manchester Siti” klublari da’vogarlik qilmoqda. Shuningdek, Madrid grandi himoyachilar Fran Garsiya hamda David Alaba va yarim himoyachi Dani Sebalyos bilan ham xayrlashishni istamoqda.
“Qirollik klubi” rahbariyati ushbu futbolchilarning kelajagi bo‘yicha qarorni Klublar o‘rtasidagi Jahon chempionati yakunlangach qabul qiladi. Hozircha ular borasida yakuniy qarorlar chiqqani yo‘q, ammo ularning ehtimoliy ketishi klubning transfer siyosatida muhim o‘rin tutishi mumkin.
Shuningdek, Luka Modrich va Lukas Vaskesning jamoani tark etishi aniq bo‘lib ulgurgan. Xorvatiyalik futbolchi faoliyatini “Milan”da davom ettirishi kutilayotgan bo‘lsa, Qatar va Saudiya Arabistoni klublari Vaskesni o‘z safiga qo‘shib olishni istamoqda.
Ma’lumot uchun, hozirda “Real” Klublar o‘rtasidagi Jahon chempionatida ishtirok etmoqda. Madridliklar chorak finalda “Borussiya D”ga qarshi maydonga tushadi. Uchrashuv O‘zbekiston vaqti bilan 5-iyuldan 6-iyulga o‘tar kechasi 01:00 da boshlanadi.
Izoh (0)