Leverkuzenning “Bayer” klubi chap qanot himoyachisi Alexandro Grimaldo “Real Madrid” qiziqishlari doirasiga tushib qoldi. Bu haqda jurnalist Matteo Moretto xabar bergan.
“Qirollik klubi” avval ham futbolchini o‘z safiga qo‘shib olishni istayotgani haqida mish-mishlar tarqalgan, biroq muzokaralar yakunlanmay qolgan edi.
Manbaga ko‘ra, madridliklar bosh murabbiyligiga tayinlanishi kutilayotgan Xabi Alonso Grimaldoning maydondagi harakatlarini yoqtiradi va u bilan “Real”da ham birga ishlashni istamoqda.
Madrid klubi rahbariyati 29 yoshli ispaniyalik futbolchini sotib olish bo‘yicha muzokara boshlash arafasida turibdi. Hozir asosiy muammo “Bayer” hisoblanadi. Sababi nemis klubi vaziyatni yaxshi biladi va iloji boricha himoyachini qimmatroqqa pullashni istamoqdi.
Transfermarkt Grimaldoning qiymatini 40 million yevroga baholamoqda. Futbolchining “Bayer” bilan shartnomasi 2027-yilning yoziga qadar amal qiladi. Himoyachi joriy mavsum leverkuzenliklar safida 47 uchrashuvda maydonga tushib, 4 gol va 12 assist muallifiga aylangan.
Ma’lumot uchun, Alexandro “Barselona” akademiyasi tarbiyalanuvchisi hisoblanadi. U 2008-yildan 2016-yilga qadar kataloniyaliklar tizimida faoliyat yuritgan. Keyin Portugaliyaning “Benfika” klubi va hozir “Bayer” sharafini himoya qilmoqda.
Izoh (0)