Angliyaning “Manchester Siti” klubi “Portu” darvozaboni Diogu Koshtani xarid qilish bo‘yicha muzokaralarni davom ettirmoqda. Bu haqda BBC xabar berdi.
Manbaga ko‘ra, 25 yoshli darvozabonning amaldagi shartnomasida ko‘rsatilgan tovon puli 75 million yevroni tashkil etadi va “shaharliklar” bu summani to‘lashga tayyor. Koshtaning o‘zi ham Angliya klubiga ko‘chib o‘tishga rozi ekani aytilmoqda.
Avvalroq “Manchester Siti” posboni Edersonning klubdan ketishi mumkinligi haqida xabarlar tarqalgan edi. Biroq u yaqinda yangi mavsumda ham jamoada qolishini ma’lum qildi. Shunga qaramay, bosh murabbiy Pep Gvardiola darvoza chizig‘ida yuzaga kelgan muammolarni bartaraf etish uchun Koshtani xarid qilishdan manfaatdor. Sababi, Ederson o‘tgan mavsumning bir qator o‘yinlarini jarohat sababli o‘tkazib yuborgan, zaxira posboni Stefan Ortega esa bir nechta xatolarga yo‘l qo‘ygan. Shu bois Gvardiola jamoaga yana bir darvozabon olib kelishni istamoqda.
Diogu Koshtaning “Portu” bilan tuzgan shartnomasi 2027-yilgacha mo‘ljallangan. U 2024/25-yilgi mavsumda jami 43 ta o‘yinda maydonga tushib, 45 ta gol o‘tkazib yuborgan va 19 o‘yinda esa o‘z darvozasi daxlsizligini saqlab qolgan. Transfermarkt portali futbolchining qiymatini 40 million yevroga baholamoqda.
Izoh (0)