“Barselona” 2025-yilning yozida birinchi bo‘lib sotib olmoqchi bo‘lgan futbolchi borasida bir qarorga keldi. Bu haqda Ispaniyaning Relevo nashri jurnalisti Aleks Pintanel X (sobiq Twitter) ijtimoiy tarmog‘ida xabar berdi.
Manba bergan xabarga ko‘ra, kataloniyaliklar yangi darvozabonga ehtiyoj sezmoqda va birinchi navbatda “Manchester Siti” qiziqish bildirayotgan “Portu”ning portugaliyalik darvozaboni Diogo Kosta bilan shartnoma imzolashga harakat qiladi.
“Barselona” sport direktori Deko Portugaliya darvozaboni Kostani Kataloniya jamoasida ko‘rishdan xursand bo‘lishini bildirgandi. Bundan tashqari, futbolchining agenti mashhur portugaliyalik murabbiy Xorxe Mendesh bo‘lib, u Deku bilan faol aloqada.
Ma’lumot uchun, 6-turda “Vilyarreal”ga qarshi o‘yinda (5:1) Ter Shtegen o‘ng tizzasining payi uzilishi natijasida mavsumning qolgan qismini o‘tkazib yuborishi ma’lum bo‘lgandi. Ayni paytda uning o‘rnini egallagan Inyaki Penya Kataloniya darvozasini qo‘riqlamoqda. Shuningdek, “Barselona” mavsum oxirigacha polshalik darvozabon Voytseh Shensni bilan shartnoma imzoladi.
25 yoshli Diogo Kosta “Portu” tarbiyalanuvchisi hisoblanadi. Joriy mavsumda darvozabon jamoasining barcha turnirlar doirasidagi 13 ta uchrashuvida qatnashib, 13 ta gol o‘tkazib yubordi va 7 ta uchrashuvda darvozasi daxlsizligini saqlab qoldi. Futbolchining klub bilan shartnomasi 2027-yilning iyun oyi oxirigacha amal qiladi. Transfermarkt internet portaliga ko‘ra futbolchining taxminiy narxi 45 million yevroni tashkil qiladi.
Izoh (0)