Angliyaning “Manchester Siti” klubi hujumkor yarim himoyachisi Klaudio Echeverri Klublar o‘rtasidagi Jahon chempionati doirasidagi “Al-Ayn”ga qarshi bahsda (6:0) jarohat oldi. Bu haqda jamoa bosh murabbiyi Pep Gvardiola ma’lum qildi.
Ispaniyalik mutaxassisning aytishicha, futbolchi 2-3 haftaga safdan chiqqan:
“U oyog‘ining to‘piq qismidan jarohat oldi. Afsuski, Klaudio 2-3 haftaga safdan chiqdi. Bu men uchun achinarli holat. Umid qilamanki, u tezroq safga qaytadi,” — dedi Gvardiola “Yuventus”ga qarshi bahs oldidan o‘tkazilgan matbuot anjumanida.
Echeverri “Siti”ga 2024-yil yanvar oyida “River Pleyt” klubidan qo‘shilgan edi. U “shaharliklar” safida 3 o‘yinda maydonga tushib, o‘z hisobiga 1 gol yozdirib qo‘ygan.
Ma’lumot uchun, “Manchester Siti” Klublar o‘rtasidagi Jahon chempionati guruh bosqichida ikki uchrashuv o‘tkazib, 6 ochko bilan 2-pog‘onani egallab turibdi. “Shaharliklar” 3-tur bahsini 26-iyundan 27-iyunga o‘tar kechasi o‘tkazadi. Uchrashuv O‘zbekiston vaqti bilan 00:00 da boshlanadi.
Izoh (0)