Italiyaning ko‘plab shaharlarida hafta oxirida kutilayotgan ekstremal issiqlik tufayli “qizil” ogohlantirish e’lon qilindi. Bu haqda Anadolu xabar berdi.
Italiya Sog‘liqni saqlash vazirligi ijtimoiy tarmoqlarda yaqin kunlarda ko‘p shaharlarga issiqlik to‘lqini kirib kelishi kutilayotganini ma’lum qilgan. Shuningdek, vazirlik tomonidan aholiga issiqlikdan saqlanish bo‘yicha tavsiya va ogohlantirishlar berilgan.
Ankona, Bolonya, Bolsano, Breshiya, Florensiya, Frozinone, Latina, Milan, Neapol, Palermo, Peruja, Peskara, Rim, Turin, Triyest, Venetsiya va Verona shaharlari uchun 28-iyun kuni eng yuqori xavf darajasi bo‘yicha “qizil” ogohlantirish e’lon qilingan.
29-iyun kuni esa Kataniya, Chivitavekkya, Rieti va Viterbo bu ro‘yxatga qo‘shiladi. Oqibatda jami 21 ta shahar jazirama xavfi ostida qoladi. Vazirlikning ta’kidlashicha, xavflilik darajasi “qizil” bo‘lgan hududlarda issiq nafaqat keksalar, bolalar va surunkali kasalliklarga chalinganlar, balki sog‘lom va jismoniy faol insonlar uchun ham jiddiy xavf tug‘dirishi mumkin.
Oldinroq AQSHda 23-iyun kuni ochiq havoda o‘tkazilgan marosimdan so‘ng jazirama tufayli 150 dan ortiq kishining ahvoli og‘irlashgani aytilgan edi. Anomal issiqlik AQSHning g‘arbidan sharqiy qirg‘og‘igacha, shuningdek, Kanadaning Ontario, Kvebek va Yangi Shotlandiya hududlariga ta’sir o‘tkazgan. Hafta davomida 160 milliondan ortiq odam issiqlik ta’sirida qolgan edi.
Izoh (0)