Yozning issiq kunlarida nafaqat chanqoqni bosish, balki kayfiyatni ko‘tarish uchun ham tabiiy ichimliklar juda muhim. Quyida sizga to‘rt xil limonad retseptini taqdim etamiz, ularning har biri o‘ziga xos, tayyorlash oson va juda mazalidir.
- Rayhonli limonad
Shirin iforli rayhon va limon uyg‘unligidan tayyorlangan sitrusli ichimlik. Ayniqsa, binafsharang rayhondan foydalansangiz, limonad yanada chiroyli rangda chiqadi.
Tayyorlash vaqti: 20 daqiqa
Porsiya: 4
Masalliqlar:
- Suv — 2 litr
- Limon — 1 dona
- Shakar — 200 g
- Yangi uzilgan rayhon — 100 g
Tayyorlanishi:
- Suvni qaynatib oling. Limon sharbatini siqib oling, po‘stini yirik qilib to‘g‘rang.
- Suvga shakar va rayhon shoxchalarini solib, shakar eriguncha isitib turing.
- Idishni olovdan olib, limon sharbati va po‘stini qo‘shing. Xona haroratida soviting.
- Limonadni suzib oling, xohlasangiz muzlatkichda soviting.
Quyultirilgan sutli limonad
Kutilmagan, lekin ajoyib uyg‘unlik: nordon limon va shirin quyultirilgan sutdan ajoyib ichimlik!
Tayyorlash vaqti: 5 daqiqa
Porsiya: 6
Masalliqlar:
- Limon sharbati — 250 ml
- Quyultirilgan sut — 200 g
- Sovuq suv — 700–750 ml
- Muz — ta’bga ko‘ra
Tayyorlanishi:
- Limon sharbatini quyultirilgan sut bilan yaxshilab aralashtiring.
- Sovuq suv qo‘shib, yana aralashtiring.
- Muz bilan stakanga solib, limon bo‘lakchalari yoki yalpiz bilan bezang.
Uyda tayyorlangan tarxun
Bolalikdagi biz sevgan ushbu ichimlik tabiiy tarxun siropi va gazlangan suvdan tayyorlanadi.
Tayyorlash vaqti: 1 soat (faol: 15 daqiqa)
Porsiya: 4
Masalliqlar:
- Tarxun — 1 bog‘
- Shakar — 100 g
- Oddiy suv — 100 ml
- Limon — ½ dona
- Gazlangan suv — 1 200 ml
Tayyorlanishi:
- Tarxunni shakar bilan blenderda bir xil massaga aylantiring. Suv qo‘shib, yana aralashtiring.
- Siropni qozonda 3–4 daqiqa qaynatib oling, so‘ng to‘liq soviting.
- Siropni elakdan o‘tkazib, limon sharbati va gazlangan suv bilan aralashtiring.
Tarvuzli oddiy limonad
Tayyorlash vaqti: 10 daqiqa
Porsiya: 2
Masalliqlar:
- Tarvuz — 2 bo‘lak
- Limon — 2 bo‘lak
- Suv — ta’bga ko‘ra
- Muz — ta’bga ko‘ra
Tayyorlanishi:
- Tarvuzni po‘stidan tozalab, urug‘larini olib tashlang va mayda bo‘laklarga bo‘ling.
- Blenderga tarvuz va limonni soling, biroz suv qo‘shib, yaxshilab ezing.
- Muz bo‘laklari bilan sovitilgan holda iching.
Maslahat: Har bir ichimlikni stakanga solishda yalpiz, limon po‘sti yoki mevali muzlar bilan bezatsangiz, ko‘rinishi yanada ishtaha ochar bo‘ladi!
Izoh (0)