Hindiston poytaxti Nyu Dehlida jazirama issiq oqibatida so‘nggi 2 kunda 52 kishi halok bo‘lgan. Bu haqda Hindiston mahalliy nashrlariga tayanib, Reuters xabar berdi.
Manbada aytilishicha, so‘nggi bir necha kunda poytaxtda muntazam issiq va quruq havo oqimi aholi salomatligiga jiddiy taʼsir ko‘rsatgan. Oftob urishi hamda zaharlanish oqibatida kasalxonaga tushganlar soni 3 barobar oshib ketgan.
So‘nggi ikki kun ichida kamida 52 ta jasad kasalxonalarga olib kelingan. Ularning aksariyati ochiq joylarda yashagan yoki mehnat qilgan kambag‘al aholi vakillari bo‘lgan.
Hindistonda joriy yilning yozi davomida 40 000 dan ortiq issiq urishi bilan bog‘liq holat qayd etilgan. 1-martdan 18-iyunga qadar kamida 110 ta o‘lim holati tasdiqlangan.
Sog‘liqni saqlash vazirligi federal va shtat muassasalariga bemorlarga zudlik bilan eʼtibor qaratishni buyurgan. Kasalxonalarda qo‘shimcha o‘rinlar ochish vazifa qilib belgilangan.
Rasmiylar iyun—iyul oylarida havo harorati meʼyordan yuqori bo‘lishini prognoz qilgan. Poytaxt Dehlida 19-iyun kuni oxirgi 50 yil ichidagi eng issiq tun kuzatilgan. Minimal harorat Selsiy shkalasi bo‘yicha 35,2 darajadan pastga tushmagan.
Izoh (0)