Kiel (IfW) Jahon iqtisodiyoti institutining Ukraine Support Tracker loyihasi ma’lumotlariga ko‘ra, Rossiyaning Ukrainaga qarshi urushi boshlanganidan buyon Yevropa mamlakatlarining Kiyevga mudofaa sanoati orqali ko‘rsatgan harbiy yordami Amerika Qo‘shma Shtatlarinikidan oshib ketdi. Bu haqda DW nashri xabar berdi.
Manbaga ko‘ra, 2025-yilning iyun oyiga kelib, Yevropa davlatlarining Ukrainaga ajratgan harbiy yordam miqdori 35,1 milliard dollarga yetgan. Bu esa AQSHning Ukrainaga ko‘rsatgan yordam miqdoridan 4,4 milliard dollarga ko‘p demakdir.
Qayd etilishicha, Yevropa davlatlari tomonidan may va iyun oylarida ajratilgan 10,5 milliard dollarning 4,6 milliardi mudofaa sanoatiga yo‘naltirilgan.
“Yevropa hozirda AQSHdan ko‘ra ko‘proq yangi harbiy texnika xarid qilmoqda. Bu esa zaxiralardan yetkazib berish o‘rniga sanoat ishlab chiqarish foydasiga aniq burilish bo‘layotganini ko‘rsatadi”, degan Ukraine Support Tracker loyihasi rahbari Taro Nisikava.
Tadqiqot mualliflari may oyida Donald Tramp ilk bor Ukrainaga katta miqdorda qurol yetkazganini qayd etgan. Biroq bu harbiy yordam emas, balki Ukrainaning o‘zi moliyalashtirishi kerak bo‘lgan savdo kelishuvlaridir.
Yevropa davlatlari esa AQSHga teskari ravishda keng qamrovli harbiy yordamni davom ettirdi. Germaniya 5 milliard yevrolik harbiy yordam paketini ajratdi. Shuningdek, Norvegiya 1,5 milliard yevro, Belgiya 1,2 milliard yevro, Niderlandiya, Buyuk Britaniya va Daniya esa 500–600 million yevro miqdorida Ukrainaga harbiy ko‘mak berdi.
Katta yettilik (G7) mamlakatlari tomonidan ajratilgan 6,3 milliard yevroga yaqin moliyaviy yordam asosan Rossiya Markaziy bankining muzlatilgan aktivlaridan tushgan daromadlar hisobidan moliyalashtirilgan. Nisikavaning ta’kidlashicha, Rossiya aktivlaridan tushayotgan daromad Ukrainani tiklash va iqtisodiyotga tushayotgan yukni kamaytirish uchun ishlatilmoqda.
Ukraine Support Tracker loyihasi rahbarining so‘zlariga ko‘ra, 2024-yilning oktyabrida va’da qilingan mablag‘larning to‘lanishi qancha davom etishi borasida savollar paydo bo‘lmoqda. Chunki donor mamlakatlarda mablag‘ kamayib bormoqda.
Ukraine Support Tracker loyihasi Rossiyaning tajovuzi boshlanganidan buyon Ukrainaga va’da qilingan harbiy, moliyaviy va gumanitar yordamni kuzatadi va miqdoran baholaydi. Loyiha ma’lumotlar bazasida 41 davlat hisobga olingan bo‘lib, ular orasida Yevropa Ittifoqi mamlakatlari, G7 a’zolari, Avstraliya, Janubiy Koreya, Turkiya, Norvegiya, Yangi Zelandiya, Shveysariya, Xitoy, Tayvan, Hindiston va Islandiya kabi davlatlar mavjud.
Ma’lumot manbasi sifatida hukumatlarning rasmiy bayonotlari va xalqaro OAV xabarlari ishlatiladi.
Izoh (0)