Sanitariya-epidemiologik osoyishtalik va jamoat salomatligi qo‘mitasi yozning jaziramasida qanday kiyinish kerakligi bo‘yicha bir necha tavsiyalar berdi.
Qo‘mita xabarida ta’kidlanishicha, yoz faslida inson organizmi haddan tashqari suvsizlanadi, shaharda havo harorati 40 darajadan oshishi mumkin. Havo issiq bo‘lganda jon saqlash uchun inson o‘z kiyimlariga, ovqatlanish ratsioniga va salqinlanish usullariga yaxshilab eʼtibor bergani maʼqul. Ayniqsa garderobdagi kiyimlarga alohida eʼtibor berish kerak.
Keng va yopiq kiyining
Havo isiganda ko‘pchilik ochiq kiyinishga harakat qiladi. Bu go‘yoki salqinlanishga yordam beradi, deb o‘ylash tabiiy. Lekin aslida u faqat havo harorati tana haroratidan past bo‘lsagina amalga oshishi mumkin. Harorat 37 darajadan o‘tishi bilanoq, tana o‘z-o‘zidan termoregulyatsiya bilan kurashishni to‘xtatadi. Terining ochiq qolgan qismidan ajralgan ter uni sovitishga vaqt topolmay, bir zumda bug‘lanadi. Yopiq liboslar esa bunday vaqtda ajoyib yechim, chunki u terning tez bug‘lanishidan saqlaydi.
Yana bir sabab quyoshning jaziramasi. Agar butun tana bo‘ylab SPF (quyoshdan asrovchi omil – uning tarkibiy qismi terini ultrabinafsha nurlaridan asraydi va bu nurlarni o‘ziga singdirib oladi) qo‘llangan bo‘lsa ham ter tufayli badan himoyasiz qoladi. Keng va yopiq kiyim quyosh va shafqatsiz ultrabinafsha nurlaridan asraydi. Shuning uchun jaziramada uzun ko‘ylak, etagi keng yubka va shlyapalar kiyish tavsiya etiladi.
Tabiiy va ochiq rangda kiyining
Sanepidqo‘m jaziramada imkon qadar tabiiy matolardan tikilgan kiyim tanlash tavsiya etdi. Bu matolarning barchasi havo o‘tkazadi va namlikni darhol o‘zlashtiradi. Agar tabiiyligiga ishonch komil bo‘lsa, albatta, ipak ham kiyish mumkin. Yoz uchun qora, to‘q yoki quyuq ranglar mos kelmaydi. Issiqda quyosh nurlarini qaytarish va kamroq isish uchun ochiq yoki oq rangli kiyim kiyish lozim.
Qatlam uslubida kiyining
“Bu g‘alati tuyiladi, lekin Osiyoning milliy chopon liboslarini eslang. Qatlamli kiyim organizm va atrofdagi issiq muhit o‘rtasida me’yorni hosil qiladi. Mayka, top yoki yengil futbolka ustidan keng ko‘ylak, nimcha kiyish jaziramada isib ketishning oldini oladi”, deyiladi qo‘mita tavsiyalarida.
Bosh kiyim kiying
Yengil sharf, paxta panama, shlyapa — asosiysi bosh quyosh nuri ostida qolmasligi kerak. Aks holda, boshning yuqori qismi issiqdan aziyat chekadi. Quyosh urishi jiddiy muammolarga olib kelishi mumkin. Qayd etilishicha, bosh kiyimning afzalligi shundaki, agar butunlay chidab bo‘lmas darajada issiq bo‘lsa ham, uni namlash va shu orqali salqinlanish mumkin.
Bu yil yoz quruq va biroz issiq ob-havo bilan boshlandi. Iyunning dastlabki haftasi respublika bo‘yicha asosan yog‘ingarchiliksiz ob-havo kuzatildi. “O‘zgidromet” prognozlariga ko‘ra, havo harorati asta-sekin ko‘tariladi.
Izoh (0)