Digital Chat Station’ning xabar berishicha, Apple iPhone 18 Pro va Pro Max modellari ekranlaridagi barcha detalardan butunlay voz kechmoqchi. Endilikda yangi smartfonlar ekrani butunlay “toza” ko‘rinishda bo‘ladi.
Kompaniya Face ID tizimi va old kamerani ekran ostiga yashiradi. Dynamic Island funksiyasi ham olib tashlanadi.
Yangi modellar 6,27 va 6,86 dyuymli OLED ekranlarga ega bo‘ladi. Har ikkala panel LTPO texnologiyasini qo‘llab-quvvatlaydi va 1,5K aniqlikda bo‘ladi.
HIAA (Hole-in-Active-Area) texnologiyasining joriy etilishi ham Apple uchun yangilik bo‘ladi. Ushbu texnologiya ekran ostidagi datchiklarga yorug‘lik o‘tishini ta’minlaydigan “shaffof” maydonlar yaratadi. Bunday tizim ilgari Samsung va ZTE tomonidan sinab ko‘rilgan.
Face ID tizimi nuqtalar proyektori, IK-kamera va yoritgich kabi murakkab infraqizil mexanizmlardan iborat bo‘ladi. Standart ekran osti texnologiyalari infraqizil nurlar bilan yaxshi ishlamaydi, shuning uchun Apple muhandislari bu borada jiddiy texnik to‘siqlarni yengib o‘tishga harakat qilmoqda.
Dynamic Island’dan voz kechish g‘oyasi iPhone 15 modelini ishlab chiqish bosqichidayoq muhokama qilingan, biroq hozirgacha smartfonning faqat o‘lchamini kichraytirishga erishilgan. 2026-yilda taqdim etilishi kutilayotgan iPhone 18 seriyasida esa ushbu maqsad to‘liq amalga oshishi mumkin.
Izoh (0)