Apple kompaniyasi buklanuvchan ekranli iPhone ustida faol ish olib bormoqda. Mashhur tahlilchi Min-Chi Kuoning so‘zlariga ko‘ra, yaqin oylarda loyihaga kompaniyaning uzoq yillik hamkori Foxconn ham jalb etiladi.
Foxconn Apple’ga yig‘uv komplektlarini yetkazib beruvchi yirik hamkorlardan biri bo‘lib, u loyiha ustidagi ishlarni 2025-yilning uchinchi chorak oxiri yoki to‘rtinchi chorakda boshlashi rejalashtirilgan. Qurilmaning ko‘plab texnik jihatlari, jumladan, bozor e’tiborini tortayotgan sharnir mexanizmi hali tasdiqlanganicha yo‘q.
Buklanadigan iPhone’ning ishlab chiqarilishi 2026-yilning yozida boshlanishi mumkin. Qurilmaning taqdimoti va rasman savdoga chiqishi esa o‘sha yilning kuziga mo‘ljallangan.
Insayderlar ma’lumotiga ko‘ra, yangi iPhone uchun bukiluvchi displeylarni Samsung Display kompaniyasi yetkazib beradi. Buyurtmaning umumiy soni 15-20 million ekranni tashkil etadi, ularni ishlab chiqarish bir necha yilga cho‘ziladi. Kompaniya birinchi yilda taxminan 6 million dona smartfonni sotishni rejalashtirgan.
Yangi modeldagi iPhone buklangan holatda 5,5 dyuymli, to‘liq yozilgan holatda esa 7,8 dyuymli ekranga ega bo‘ladi. Qurilmaning qalinligi mos ravishda 9,5 mm va 4,5 mm bo‘ladi. Displeydagi buklama chizig‘i deyarli sezilmaydi. Apple bu modelda Face ID o‘rniga Touch ID texnologiyasini joriy etishni rejalashtirgan. Uning taxminiy narxi 2 000 dan 2 500 dollargacha bo‘lishi kutilmoqda.
Izoh (0)