Har yili e’tibor markazida bo‘ladigan Apple’ning yangi iPhone taqdimoti bu yil ham sentyabr oyida bo‘lib o‘tadi. Doimgidek, taqdimotga yaqinlashgan sari yangi modellar haqidagi mish-mishlar, texnik tafsilotlar va insayder ma’lumotlar internetda ko‘paymoqda. Yaqinda paydo bo‘lgan xabarlardan biri esa ko‘pchilikni hayratga soldi, unga ko‘ra, iPhone 17 va 17 Air modellarining ekran sifati avvalgi iPhone’lar darajasiga yetmasligi mumkin.
Insayder Fixed Focus Digital ma’lum qilishicha, iPhone 17 va 17 Air modellari avvalgi modellar bilan solishtirganda yomonroq ekranlarga ega bo‘ladi. Manbaga ko‘ra, barcha modellarda yuqori yangilanish chastotasiga ega displeylar bo‘ladi, biroq ProMotion texnologiyasi faqat iPhone 17 Pro va 17 Pro Max versiyalariga xos bo‘lib qoladi. Flagman versiyalar ilg‘or LTPO OLED ekranlar bilan jihozlanadi, iPhone 17 va 17 Air esa LTPS texnologiyasidagi OLED displeyga ega bo‘ladi.
Bunday ekranlar 1 dan 120 Gts gacha bo‘lgan dinamik chastota o‘zgarishini qo‘llab-quvvatlamaydi. Bu esa bazaviy modellar batareyani ko‘proq sarflashi va ekranlar ko‘rsatilayotgan kontentga mos ravishda yangilanish chastotasini avtomatik o‘zgartira olmasligini anglatadi. Masalan, agar 24 kadr/s da film yoqilsa, displey 30, 60 yoki 120 Gts chastotada yangilanadi. Biroq Pro versiyalarda tasvir aynan 24 Gts da namoyish qilinadi.
ProMotion texnologiyasi Apple flagman smartfonlarida ilk bor 2021-yildagi iPhone 13 Pro modelida qo‘llanilgan edi. Shunday qilib, bu jihatdan yangi modellarning ekran sifati hatto eski iPhone’lardan ham past bo‘ladi.
Izoh (0)